Ministériu Finansas, liu hosi Diresaun Jerál Alfandega iha loron 8 Outubro 2014 loke kontentór 18, ne’ebé identifika abandona iha Porto Dili, entre fulan neen to’o tinan ida ona.

Hosi kontentór 18 ne’e, loke de’it 9  no restu sei loke iha tempu oin mai.  Hafoin loke no observa tiha, Alfandega taka fali kontentór sira-ne’e hodi halo tuir prosesu sira tuir mai.

Tuir Diretór Jerál Alfandega, José António Fátima Abilio informa, iha Lei númeru 9 fó kompeténsia ba Alfandega atu identifika kontentor sira ne’ebé na’in la buka tuir no tau hela iha Portu. Tuir kódigu Adeneiru, Alfandega iha kompeténsia atu loke kontentor ne’ebé paradu hela iha portu, hafoin loron 60, hodi hatene  saida mak iha laran. “Bainhira kontentor paradu hela no na’in la mai buka tuir, bele deskonfia ona kona-ba saida mak iha kontentór laran”, Diretór esplika.

Hafoin loke tiha kontetór no prosede tuir prosedimentu legal, no indentifika katak sasan sira iha kontentór laran seidauk liu prazu, sei haree fali atu halo leilaun. Maibé, bainhira liu ona prazu,  sei halo distruisaun, tuir proseidmentu no Alfandega nia knar.

“Ne’e oportunidade atu fó sai ba públiku, liu-liu importador sira, katak,  bainhira sira importa sasan, tenki haree tuir Lei.  Labele importa sasan arbiru de’it, tanba bele automatikamente prejudika no sai risku ba importadór ilegal,” nia dehan tan.

Tuir xefe Departamentu Aportil, Zonas Alves, Aportil sempre halo kordenasaun di’ak no sevisu hamutuk ho alfandega kona-ba kontentór sira ne’ebé abandonadu hodi hola medidas hasoru material sira ne’ebé abandonadu.

Tuir informasaun ne’ebé hetan iha terrenu, hosi kontentór 9 ne’ebé loke ona ne’e, iha laran iha kareta sira, material kareta nian, armariu ka materiál eskritóriu nian, rolu fiu eletrisidade ne’ebé laiha segel, kaixa nakonu ho komponente teknolojia hosi Vietnam, no kontentór ida  mamuk.

Iha atividae ne’e, Alfandega konvida mós instituisaun relevante sira hanesan Ministériu Agrikultura no Pescas, Ministériu Saúde, karantina ho portu rasik atu haree hamutuk kontentor sira-ne’e.