Ministériu Finansas liu hosi Diresaun Jerál Finansas Estadu, iha loron 9 fulan Outubru 2014, inaugura Ofisina Nasionál Estadu “Pilotu” ba Gabinete Vise Primeiru-Ministru, Ministériu Finansas, Sekretaria Estadu Seguransa no Provedoria Direitu Umanu no Justisa, iha Eis. UN Transport Balide, Dili.
Iha Serimónia inaugurasaun ne’e Vise Primeiru-Ministru, Fernando Lasaman Araújo, husu ba diretora nasional patrimónia estadu nian atu jere ofisina ne’e ho didi’ak ho nasionalizmu no patriotizmu.
Tuir Ministra Finansas Interina, Santina Cardoso katak, Ita la konsege halo jestaun ida ne’ebé mak efetivu, ita hakarak hatudu ezemplu se ita bele duni poupa kustu ba manutensaun, reparasaun no mós ba kustu mina, se ita bele halo ida ne’e entaun instituisaun sira seluk mós ita bele halo tuir.
Ministra ne’e mós subliña liután katak, MoF komesa tau ona GPS iha kareta sira para bele iha limitasaun no kontrolu ba movimentu kareta iha Dili laran, katak kareta sira ne’ebé sirkula iha Dili tenke iha Dili laran de’it maibé wainhira hakarak sai hosi Dili tenki husu lisensa ho objetivu saida kareta ne’e hakarak sai hosi Dili, se bainhira laiha lisensa kareta sai hosi Dili bele mate ka para automátika, ida ne’e pasu seluk atu bele reforsa liután kontrolu emtermusde utilizasaun Orsamentu Jerál Estadu.
Iha parte seluk, Diretór Jerál Finansas Estadu, Januario Gama, hateten katak, hanesan ofisina pilotu sei asume responsabilidade hodi bele kontribui ba iha redusaun despezas manutensaun no reparasaun, kombustivel no bele estabelese modelu di’ak ba iha kompañia sira hodi bele banati tuir liu hosi estadarizasaun sistema ne’ebé efetivu no efikás liután. Susesu no kualidade manutensaun liu hosi atendimentu ofisina ida ne’e sei bele hetan wainhira iha kontribuisaun no kooperasaun di’ak hosi instituisaun sira ne’ebé submete ba iha ofisina pilotu ida ne’e.
Diretór ne’e subliña liután katak, Iha ofisina ida ne’e, sei halo uluk manuntensaun minor, manutensaun A, B no C, entretantu ba iha manutensaun maior sei liu hosi faze inspesaun iha ofisina no sei halo rekomendasaun profunda ida ba iha kompañia sira ne’ebé iha kontratu halo manutensaun maibé depoiz de servisu manutensaun kompleta kareta sira tenki lori mai iha ofisina nasionál pilotu lori bele halo inspesaun hodi kontrola dehan katak kareta sira kompañia halo ona manutensaun no bele komprova mós kualidade manutensaun no reparasaun hosi kompañia privadu sira.
Tuir Dire’tor ne’e, númeru kareta estadu ne’ebé tama ba iha ofisina hamutuk 419 kompostu hosi viatura ba Ministériu Finansas 192 inklui kareta foun hamutuk 54, ne’e seidauk inklui kareta VIP ne’ebé sosa ba CPLP, enkuantu hosi Provedoria dos Direitus Humanus no Justisa hamutuk 22, hosi Sekretaria Estadu Seguransa hamutuk 101 no hosi Gabinete Vise Primeiru-Ministru 14.
Estrutura Ofisina Pilotu refere Supervizaun diretamente hosi Diretór Nasionál Patrimóniu Estadu, no ténikamente sei jere hosi Xefe Departamentu Partimóniu Estadu ho ninia kompozisaun estrutura, xefe mékaniku, resepsaun, sala feramentas no seksaun manutensaun, tenik Diretór Gama.
Marka prezensa serimónia inaugurasaun ne’e Primieru-Ministru Interinu, Fernando Lasama de Araújo, Vise Ministra Finansas hanesan mós ministra interina, Santina Cardoso, Sekretáriu Estadu Seguransa, Francisco da Costa Guterres, reprezentante hosi Provedoria Direitus Humanus no Justisa, reprezentante Sekretaria Estadu Fortalesimentu Institusionál, Padre Paroco Balide, Diretór Jerál no Nasionál sira, Assessor no funsionáriu sira no mós reprezentante hosi offisina sira iha Dili nian.