Ministru Estadu no Negósiu Estranjeiru no Kooperasaun, José Luís Guterres, hala’o vizita servisu nian ida ba Lisboa, Portugál, iha loron 13 fulan-Outubru atu hala’o surumutu ida ho Sekretáriu Ezekutivu Komunidade Lian Portugés (CPLP) nian, Murade Murargy, ne’ebé sei ko’alia kona-ba Sorumutu Estraordináriu Konsellu Ministru CPLP nian, ne’ebé atu hala’o iha loron 29 fulan-Outubru iha Guiné-Bissau.

Husi Portugál, Ministru Estadu Negósiu Estranjeiru no Kooperasaun, sei hakat ba Itália hodi partisispa iha 10th Global China Busines Meeting, iha loron 13 no loron 14 fulan-Outubru iha Lago Como, iha ne’ebé sei mai emprezáriu no ofisiál Governu nian maizomenus 400 husi Xina no nasaun sira seluk husi kontinente Amérika no Europa. José Luís Guterres mós sei sai hanesan oradór iha loron 14 fulan-outubru entre oradór sira seluk ne’ebé simu ona konvite. Objetivu husi eventu ne’e maka atu analiza motór prinsipál sira iha área ekonómika, sosiál no teknolójika ne’ebé dadaun ne’e funsiona iha Xina.

Iha loron 15 fulan-outubru, Ministru José Luís Guterres, dezloka ba Bruxelas, iha ne’ebé nia sei hela to’o loron 17, atu halo diálogu polítiku ida ho Uniaun Europeia. Tau ona iha ajenda sorumutu lubuk ida ho membru Parlamentu Europeu nian, liuliu ho deputadu sira husi Komisaun Dezenvolvimentu no Servisu Esterna (DEVE) no Servisu Asaun Esterna (EAS) no mós ho funsionáriu altu sira husi Komisaun Europeia nian. Ministru José Luís Guterres hasoru malu mós ho funsionáriu altu sira husi Diresaun-Jerál ba Kooperasaun no Dezenvolvimentu Komisaun Europeia (CODEVE) nian. Kestaun kona-ba vistu livre ba timoroan sira iha espasu Schengen, sei sai hanesan tópiku ida ne’ebé mak sei ko’alia durante sorumutuk sira ne’e.