Sorumutu estraordináriu Konsellu Ministrus nian iha loron 13 fulan-outubru tinan 2014
Prezidénsia Konsellu Ministrus
V Governu Konstitusionál
..............................................................................................................................
Díli, Loron 13 Fulan outubru Tinan 2014
Komunikadu Imprensa
Sorumutu estraordináriu Konsellu Ministrus nian iha loron 13 fulan outubru tinan 2014
Governu hala’o sorumutu estraordináriu iha loron-segunda ne’e, loron 13 fulan outubru tinan 2014, iha sala sorumutu Konsellu Ministrus nian, iha Palásiu Governu, iha Díli, no aprova tiha ona:
1. Projetu sira kona-ba konstrusaun rede rodoviária nasionál
Konsellu Ministrus aseita ona paresér husi Komisaun Nasionál Aprovizionamentu nian kona-ba konkursu sira kona-ba konsesaun projetu sira iha setór hadi’a rede rodoviára. Liuliu, ba projetu sira ne’ebé maka iha relasaun ho hadi’a no halo manutensau ba ligasaun rodoviária ba estrada ne’ebé liga Laklubar ho Natarbora, no estrada ne’ebé liga Dili ho Ainaro (Bandudatu – Aituto no Aituto - Ainaro).
Konsellu Ministru analiza mós diploma rua mak hanesan:
1. Proposta Lei ne’ebé mak aprova Orsamentu Jerál Estadu Repúblika Demokrátika Timor-Leste ba tinan 2015
Iha kontinuasaun husi sorumutu Konsellu Ministrus kotuk ba (sorumutu estraordináriu iha loron 2 fulan outubru tinan 2014), iha ne’ebé mak halo aprovasaun ba Lei ne’ebé a,prova Orsamentu Jerál Estadu Repúblika Demokrátika Timor-Leste ba tinan 2015, no molok halo nia aprezentasaun ba Parlamentu Nasionál, Governu analiza ona kestaun balun ne’ebé mak iha relasaun, liu-liu ba dokumentasaun ne’ebé maka sustenta Proposta Lei ne’e.
2. Alterasaun dahuluk ba Lei Orsamentu Jerál Estadu Repúblika Demokrátika Timor-Leste ba tinan 2014
Diploma ida ne’e sustenta nesesidade atu altera Lei Orsamentu Jeral Estadu nian ba tinan 2014 atubele permite levantamentu ida ne’ebé boot liu husi Rendimentu Sustentável Estimadu (RSE) husi Fundu Mina-rai nian karik ezekusaun orsamentál liu ona (porsentu) 75% atu nune’e bele asegura reserva likidéz (osan) ne’ebé presiza atubele hatán ba kualkér akontesimentu hirak ne’ebé la previstu, hanesan posibilidade kona-ba dezastre naturál boot hirak ne’ebé bele estraga Timor-Leste hanesan hirak ne’ebé akontese iha rejiaun Ázia Pasífiku nian.
