Primeiru-Ministru partisipa comemorasaun iha Loron Forsa Armada Indonézia no Fórum Demokrasia Bali nian ba da-VII
Primeiru-Ministru Kay Rala Xanana Gusmão sei partisipa comemorasaun iha Loron Forsa Armada indonézia nian (TNI-Tentara Nasional Indonesia), ne’ebé sei hala’o iha loron 7 fulan-outubru iha Surabaya no iha Forum Demokrasia Bali nian da-VII ne’ebé sei hala’o iha loron 10 no loron 11 fulan-outubru.
Xanana Gusmão nu’udar konvidadu espesiál iha komemorasaun Surabaya, ne’ebé sei akompaña hosi Sekretáriu Estadu Defeza, Júlio Tomás Pinto, Majór Jenerál, Lere Anan Timur, Vise Ministru Negósiu Estranjeiru no Kooperasaun, Constâncio Pinto, no hosi reprezentante veteranu nian sira.
Iha loron 10 no loron 11 fulan-outubru sei hala’o edisaun da-VII Fórum Demokrasia Bali nian.
Iha loron 10, Primeiru-Ministru sei hala’o diskursu iha Sesaun Abertura, sira hanesan baibain akontese tiha ona hahú kedas bainhira Forum ne’e eziste (tinan 2008), ne’ebé mak Xanana Gusmão sempre marka ninia prezensa.
Iha nia edisaun da-VII, Forum Demokrasia Bali kona-ba tema“ Evolusaun hosi Arkitetura Rejionál Demokrátika”,no liliu hanesan eventu ikus nian ho Susilo Bambang Yudhoyono nu’udar Prezidente Repúblika.
Forum internasionál ne’e hanesan inisiativa ida hosi Prezidente Susilo Bambang Yudhoyono, iha tinan 2008.
Primeiru-Ministru fila mai Timor-Lesta iha loron 12 fulan-outubru.
