Ministru Estadu no Negosius Estranjeirus no Koperasaun Timor-Leste, José Luís Guterres, ho Ministru Negosius Estranjeirus Repúblika Bielorrúsia, Vladimir Makei, iha loron 1 Outubru 2014, assina Deklarasaun Konjunta hodi estabelese relasaun diplomatika entre nasaun rua ne’e, iha Nova Yorke.

Objetivu hosi assinatura dokumentu ne’e mak atu hametin liu tan relasaun diplomatika entre Timor-Leste ho Bielorrúsia liu hosi koperasaun bilateral iha area ekonomia, juridika no mos iha aspetu humanitariu nian.

Deklarasaun Konjunta refere hatudu rai rua ne’e nian hakarak atu estabelese relasaun diplomatika tuir prinsipiu Direitu Internasional, nune’e mos tuir meta no objetivu Karta Nasõens Unidas nian, liu-liu konabá promosaun pas ho seguransa internasional, respeitu ba igualdade, soberania nasional, independensia, integridade territorial entre Estado sira no prinsipiu la interfere iha assuntu internu Estadu seluk nian, nune’e mos konabá adezaun ba tratadu internasional sira.

Estabelesimentu relasaun diplomatika entre rai rua haktuir iha Konvensaun Viena konabá Relasõens Diplomatikas, loron 18 Abril 1961, hahu hosi data ne’ebé rai rua ne’e assina Deklarasaun Konjunta.

Bielorrúsia, rai ida ne’ebé, nia ekonomia depende ba Agrikultura no Industria. Liu hosi lasu bilateral, Timor-Leste ho Bielorrúsia bele servisu hamutuk ba benefisiu rai rua ne’e.