Timor-Leste simu prémiu hosi Organizasaun Mundiál Saúde
Ministru Estadu no Prezidénsia Konsellu Ministru no
Porta-Vóz Ofisiál Governu Timor-Leste
Dili, loron 18 fulan Setembru tinan 2014
Timor-Leste simu prémiu hosi Organizasaun Mundiál Saúde
Organizasaun Mundiál Saúde ba Rejiaun Sudeste Aziátiku (OMS-SEARO) fó “Prémiu Exelénsia iha Saúde Públika Rejiaun nian” ida ba Programa Nasionál Kontrolu Malária (PNKM) Timor-Leste nian.
Diretór Rejionál OMS ba Sudeste Aziátiku, Dr. Poonam Khetrapal Singh, entrega prémiu ne’e iha loron 10 fulan-setembru, durante Sesaun Sorumutuk OMS-SEARO nian ba-67, iha Daca – Bangladexe, no Ministru Saúde, Sérgio Lobo, lori Timor-Leste nia naran simu prémiu ona ne’e. Ida-ne’e mak hanesan prémiu ida hosi prémiu rua ne’ebé fó iha loron ne’e.
Iha tinan 2006 rejista tiha ona kazu malária hamutuk 223,000 iha Timor-Leste no ema na’in-68 resin maka tanba moras ne’e. Iha tinan kotuk, númeru kazu ne’e tuun tebetebes ba 1.042, ho kazu mate iha tolu de’it. Ho insidénsia ida hosi < kazu 1 ba kada populasaun 1000, Timor-Leste atinji ona Objetivu Dezenvolvimentu Miléniu (ODM) ba funu hasoru malária.
Rezultadu ida ne’ebé mak di’ak tebtebes tanba esforsu maka’as ba prevensaun ba moras ne’ebé hala’o iha rai-laran tomak, ho orientasaun husi PNKM, hetan apoiu hosi asisténsia téknika no kompromisu polítiku ne’ebé forte. Entre fatores hirak ne’ebé kontribui hodi hetan rezultadu ba programa ne’e mak implementasaun teste foun sira kona-ba diagnóstiku lais, introdusaun kona-ba tratamentu ba malária ne’ebé efisiente liu no hadi’a asesu ba sentru saúde sira. Funsionáriu sira programa kontrolu malária oras ne’e daudaun ativu hela iha subdistritu 65 Timor-Leste nian.
Asaun sira ba prevensaun moras nian mós hetan prioridade hotu, inklui fahe rede moskiteira nian sira ba inan isin-rua kona-ba kuidadu molok atu tuur-ahi no ba populasaun porsentu 80 ne’ebé moris iha área sira ho risku boot. Pulverizasaun ba abitasaun ho insetisida asaun reziduál nian mós hala’o iha área sira-ne’e.
Dr. Singh hatete katak Programa Nasionál Kontrolu Malária Timor-Leste nian merese hetan felisitasaun tanba ninia susesu no merese “...atu hahii tanba salva ema nia moris no atinje ODM ba malária nian iha tempu ne’ebé badak no ho rezultadu ida-ne’ebé dramátiku tebetebes”. Diretór Rejionál OMS ba Sudeste Aziátiku haree ona katak esforsu hirak Timor-Leste nian “...bele hakbiit di’ak liu programa kontrolu malária seluk iha nasaun sira ne’ebé foin dezenvolve”.
Portavós Governu nian, Ágio Pereira, hato’o parabens ba traballadór sira Saúde Públika nian no ninia parseiru sira iha Timor-Leste, tanba hetan rezultadu ne’ebé mak di’ak tebtebes; “hadi’a kondisaun moris povu Timoroan nian no rezultadu husi esforsu maka’as iha tinan barak nia laran”.
