Sorumutuk estraordináriu Konsellu Ministrus nian iha loron 28 fulan-agostu tinan 2014
Prezidénsia Konsellu Ministrus
V Governu Konstitusionál
..............................................................................................................................
Díli, Loron 28 Fulan Agostu Tinan 2014
Komunikadu Imprensa
Sorumutuk estraordináriu Konsellu Ministrus nian iha loron 28 fulan-agostu tinan 2014
Governu hala’o sorumutu estraórdinária iha kinta-feira ne’e, loron 28 fulan-agostu tinan 2014, iha sala sorumutuk Konsellu Ministrus nian, iha Palásiu Governu, Dili, no aprova tiha ona:
1. Rezolusaun Governu nian ne’ebé aprova kriasaun Komisaun Tranzisaun nian ida ba Oe-Cusse Ambeno
Aprovasaun ba Lei n.u 3/2014, loron 18 fulan-juñu, ne’ebé kria Rejiaun Administrativa Espesiál Oe-Cusse Ambeno, implika nesesidade atu jere pasajen responsabilidade ba nível administrasaun territóriu nian oin-oin. Importante mós, atu estrutura formalmente relasionamentu entre Autoridade Rejiaun nian, ne’ebé foin kria, no órgaun sentrál sira Administrasaun nian, liu-liu Governu.
Nune’e, Diploma ida-ne’e estabelese entidade tranzitória ida hodi jere transferénsia responsabilidade sira ne’ebé integra membru Governu sira no elementu sira husi Autoridade Oe-Cusse Ambeno nian, no mós elementu sira husi Administrasaun Sentrál no Distritál no husi grupu servisu pré-deskonsentrasaun nian.
2. Proposta kona-ba Rezolusaun Parlamentu Nasionál nian ba aprovasaun Akordu entre Governu Repúblika Demokrátika Timor-Leste no Governu Repúblika Indonézia nian kona-ba Atividade Kooperasaun nian sira iha área Defeza
Haree ba importánsia husi dezenvolvimentu, entre nasaun sira, ho vínkulu kooperasaun nian iha área defeza no seguransa, maka halo ona asinatura iha fulan-agostu tinan 2011, Akordu entre Governu Repúblika Demokrátika Timor-Leste no Governu Repúblika Indonésia, kona-ba Atividade Kooperasaun nian iha área Defeza.
Tanba tuir kompeténsia konstitusionál nian, Parlamentu Nasionál maka iha knaar atu halo aprovasaun ba akordu sira ho natureza hanesan ne’e, Governu propoin ba órgaun soberania ida ne’e atubele halo aprovasaun.
3. Alterasaun dahuluk ba Dekretu Governu nian kona-ba Ezekusaun Orsamentu Jerál Estadu nian ba 2014
Alterasaun hirak ne’ebé halo iha diploma ida ne’e ninia objetivu maka hanaruk tan, to’o ba iha fulan-setembru nia rohan, prazu aprovasaun nian ba alterasaun orsamentál sira, tantu entre diresaun sira nune’e mós ho kategoria despeza nian, no mós, atu adapta, ba efeitu aprezentasaun kona-ba garantia bankária sira ne’ebé iha hela kontratu ho Estadu, rekizitu sira rating nian husi banku komersiál sira ba situasaun loloos nasaun nian.
