Sorumutuk estraordináriu Konsellu Ministrus nian iha loron 22 fulan-agostu tinan 2014
Prezidénsia Konsellu Ministrus
V Governu Konstitusionál
..............................................................................................................................
Díli, Loron 22 Fulan Agostu Tinan 2014
Komunikadu Imprensa
Sorumutuk estraordináriu Konsellu Ministrus nian iha loron 22 fulan-agostu tinan 2014
Governu hala’o sorumutuk estraordináriu iha sesta ne’e, loron 22 fulan-agostu tinan 2014, iha sala sorumutuk Konsellu Ministrus nian, iha Palásiu Governu, iha Dili, no aprova ona:
1. Rezolusaun Governu nian kona-ba atu sosa ró tula pasajeiru nian
Governu hakotu atu sosa ró tula sasán no pasajeiru nian ida atu ba-mai rejiaun Oe-kuse Ambenu. Desizaun ida ne’e foti iha sekuénsia husi sorumutuk Konsellu Ministrus nian, iha fulan-abríl liubá, iha Oe-kuse Ambenu, iha ne’ebé Governu hakotu atu haruka ekipa téknika ida husi Ministériu Transporte no Komunikasaun ba Portugál atu avalia folin no kualidade kontrusaun ba ró foun ida ba Timor-Leste. Tanba avaliasaun ne’ebé ekipa ne’e halo tiha ona pozitiva, no haree ba urjénsia atu sosa meiu transporte tasi nian ida ne’e atu hatán ba nesesidade sirkulasaun ba-mai Oekuse Ambenu (iha ne’ebé projetu implementasaun Rejiaun Administrativa Espesiál la’o hela, no iha ne’ebé maka tinan oin sei hala’o komemorasaun tinan 500 misionáriu portugés sira to’o iha illa Timor), Governu hakotu autoriza akizisaun ida ne’e sein liuhusi konkursu.
2. Rezolusaun Governu nian ne’ebé reforsa seguransa nasionál
Diploma ida ne’e estabelese períodu foun ida, atu rekolla kilat, kilat-musan, esplozivu no fardamentu, atu sidadaun no entidade sira ne’ebé seidauk kumpre bele ba entrega ona materiál ilegál hirak ne’ebé sira sei uza hela no kolabora ba manutensaun estabilidade polítika no sosiál ne’ebé agora iha.
Medida ida ne’e mosu iha sekuénsia husi grupu paramilitár hirak ne’ebé ikus-ikus ne’e mosu fila-fali, ne’ebé halo mós Parlamentu Nasionál rejeita tentativa sira atu kria instabilidade no ameasa ba Estadu Direitu ne’ebé mai husi sira, liuhusi ninia Rezolusaun n.u 4/2004.
Tanba Governu maka iha kompeténsia atu foti medida hirak ne’ebé presiza ba garantia, promosaun no gozu direitu no liberdade fundamentál sira sidadaun sira nian, no mós atu asegura orden públika no dixiplina sosiál, no tuir rezultadu hirak ne’ebé hetan ona iha tempu kotuk ho kampaa nasionál rekolla kilat, Governu hakotu hodi estabelese períodu foun ida atu rekolla kilat, kilat-musan, esplozivu no fardamentu, ne’ebé sei remata iha loron 31 fula-outubru tinan 2014.
3. Dekretu-Lei ne’ebé aprova tranzmisaun direitu sira kona-ba bein imovel sira komunidade nian no privadu nian ba Estadu iha ámbitu Projeto Suai Supply Base
Diploma ida ne’e estebelese rejime espesiál ida ne’ebé bele aplika ba tranzmisaun temporária kona-ba direitu propriedade nian kona-ba bein imovel sira komunidade nian no privadu nian ba Estadu, iha relasaun ho implementasaun projeto Suai Supply Base.
