Ministru Adminsitrasaun Estatal, Jorge da Conceição Teme akompaña hosi Sekretáriu Estadu Desentralizasaun Administativa, Tomás Cabral fó posse ba Konsellu Konsultivu Lokál hamutuk na’in atus haat neen (406) kompostu hosi distritu Aileu, Díli, Ermera, Liquisa no Manatuto. Serimónia tomadade posse ne’e hala’o iha loron 12 Agostu 2014, iha edifísiu Administrasaun Distritu Díli, Matadoro, Díli.

Ministru Adminsitrasaun Estatal, Jorge da Conceição Teme iha ninia diskursu hateten, Konsellu Konsultivu Lokál nia knaar importante liu maka atu fó hanoin, fó konsellu, no fó ideias ne’ebé kriativa no krítikas hodi bele hamutuk ho Konsellu permanente distritál, Grupu Traballu Permanente iha nível nasionál bele realiza saida mak ita bolu deskonsentrasaun administrativa hodi loron ida ita bele desentraliza duni ita-nia servisu no ita-nia atendimentu ba ita-nia povu.

Konsellu Konsultivu Lokál hetan fiar, hosi idaidak nia assosiasaun, iha reprezentante veteranus, joventude, partidu polítiku, sosiedade sivil no relijiozu. Konsellu ida ne’e konsellu koletivu ida atu ita bele hato’o ita-nia hanoin hosi aspeitu hotu-hotu ne’ebé kontribui ba bem estar, ba lalaok ka prosesu ne’ebé di’ak hodi ita bele hetan rezultadu ka espetativu ida ne’ebé di’ak ba futuru estabelesimentu munisipiu, tenik Teme.

Ministru ne’e mós husu ba emposadu sira atu prienxe knaar ida ka pozisaun ida ne’ebé la’os atu defende ego individuál, ego rejionalizmu ka defende ita-nia ego kulturál maibé hola parte iha konsellu ida ne’e atu defende interesse Estadu no defende interesse no mehi povu ninian.

Iha sorin seluk, Sekretáriu Estadu Desentralizasaun Administativa, Tomás Cabral, fó parabens ba distritu 5 hanesan distritu Aileu, Díli, Ermera, Liquisa no Manatuto ne’ebé mai konsentra iha Díli lori simu posse ba Konsellu Konsultivu Lokál.

Sekretáriu Estadu ne’e mós hatutan tán katak, Konsellu Konsultivu Lokál reprezenta hosi setór privadu sira, feto sira, lia na’in sira, ukun fiar sira no veteranu sira. Tuir Lei  Konsellu Konsultivu Lokál nia dever atu fó parecer ba grupu tékniku permanente distritál.