Primeiru Ministru Kay Rala Xanana Gusmão sei desloka ba Reinu Tailândia no Repúblika Coreia do Sul, iha loron 6 to’o loron 13 fulan agostu.

Hanesan Primeiru Ministru Timor-Leste no Prezidente Komisaun Ekonómika no Sosiál Nasoens Unidas nian sira ba da-69 ba Ásia-Pacífico (UNESCAP), Xanana Gusmão sei halo diskursu maklokek ida, iha loron 7 fulan agostu, iha II Faze ba da-70 sesaun hosi Komisaun Ekonómika no Sosiál ba Ásia no Pacífico, ne’ebé sei hala’o iha loron 4 to’o loron 8 fulan agostu iha Banguecoque.

Husi kapitál Tailândia nian, Primeiru Ministru ba fali Coreia do Sul ne’ebé, hetan konvite hosi Federasaun ba Pás Universál (Universal Peace Federation), nia mak sei sai nu’udar oradór prinsipál iha Sesaun Maklokek nian, iha loron 10 fulan agostu, Simeira Mundiál tinan 2014 nian kona-ba “Pás, Seguransa no Dezenvolvimentu Umanu”, ne’ebé sei hala’o iha Seul iha loron 9 to’o loron 13 fulan agostu.