Sorumutuk estraordináriu Konsellu Ministru nian iha loron 29 fulan Jullu tinan 2014
Prezidénsia Konsellu Ministrus
V Governu Konstitusionál
..............................................................................................................................
Díli, Loron 29 Fulan Jullu Tinan 2014
Komunikadu Imprensa
Sorumutuk estraordináriu Konsellu Ministru nian iha loron 29 fulan Jullu tinan 2014
Governu hala’o sorumutuk estraoridináriu iha tersa-feira, loron 29 fulan Jullu tinan 2014, iha sorumutuk Konsellu Ministru nian, iha Palásiu Governu, iha Díli, hodi halo análize ida detallada, hosi parte ministériu hothotu nian, kona-ba susesu no frajilidade ne’ebé hasoru durante organizasaun Simeira Komunidade País Lian Portugeza nian (CPLP sigla iha lian portugés) ne’ebé hala’o tiha ona iha Díli, husi loron 17 to’o loron 23 fulan ida-ne’e, no Sorumutuk ho Parseiru Dezenvolvimentu Timor-Leste nian ne’ebé hala’o tuir kedas, iha loron 25 no 26 fulan Jullu. Halo mós análize ida ba akordu sira entre Timor-Leste no país sira seluk CPLP nian durante Simeira ne’e.
Konsellu Ministru afirma katak eventu ne’e hala’o di’ak tebes, maibé atu organiza fali eventu hirak hanesan ne’e presiza halo preparasaun ida iha tempu naruk.
Iha sorumutuk ne’e, Konsellu Ministru aprova ona:
1. Rezolusaun Governu nian ne’ebé haksolok ba populasaun timoroan hothotu no liuliu ba foin sa’e sira ninia kontributu hodi bele fasilita realizasaun Simeira CPLP Díli nian
Governu fó parabéns ba Povu Timor-Leste, liuliu ba joven sira, ne’ebé hatudu sira ninia ezemplu di’ak tebtebes hodi apoia realizasaun Simeira CPLP nian iha Díli. Governu fó hanoin mós, ba populasaun sira atu mantein sira ninia komportamentu ne’ebé di’ak tebes, liuliu kona-ba kestaun limpeza no konserva sidade Díli moos nafatin.
2. Rezolusaun Governu nian ne’ebé aprova realizasaun akordu hirak hamutuk ho komunidade sira ne’ebé hela iha zona Baze Lojístika Suai nian no ninia aeroportu
Konstrusaun infraestrutura ida-ne’e nian importante tebes ba dezenvolvimentu país nian hanesan inisiativa ida di’ak hosi populasaun sira ne’ebé oferese sira nia rai. Nune’e atu fatin ba dezenvolvimentu obra sira Baze Lojístika Suai nian no rekonversaun no remodelasaun ba ninia aeroportu sei halo akordu hamutuk ho populasaun sira ne’ebé hela iha fatin-ne’e no mós reprezentante komunidade lokál nian sira.
