Sorumutuk ho Parseiru Dezenvolvimentu Timor-Leste nian ba tinan 2014 foka liu-ba implementasaun Planu Estratéjiku Dezenvolvimentu (PED)
Ministru Estadu no Prezidénsia Konsellu Ministru no
Porta-Vóz Ofisiál Governu Timor-Leste
Dili, loron 30 fulan Jullu tinan 2014
Sorumutuk ho Parseiru Dezenvolvimentu Timor-Leste nian ba tinan 2014 foka liu-ba implementasaun Planu Estratéjiku Dezenvolvimentu (PED)
Sorumutuk tinan-tinan ho Parseiru Dezenvolvimentu Timor-Leste (RPDTL, tuir sigla iha lian Inglés nian: TLDPM), hala’o iha loron 25 no 26 fulan Jullu, iha Sentru Konvensaun Dili. Reprezentante Governu nian, Parseiru Dezenvolvimentu, Sosiedade Sivíl no Setór Privadu halibur hamutuk hodi dikuti kona-ba progresu implementasaun Planu Estratéjiku Dezenvolvimentu 2011-2030 (PED) no atu konsidera forma hirak atu hakbiit ninia implementasaun no rezultadu dezenvolvimentu hirak ne’ebé atu hetan. Sorumutuk tinan ida ne’e nian marka tiha ba hafoin Simeira CPLP nian atu nune’e bele permiti atu hetan kontribuisaun hosi nasaun belun sira Lian Portugés nian hosi mundu tomak.
Sorumutuk ida ne’e ministru na’in rua mak prezide hamutuk, Ministru Negósius Estranjéirus no Koperasaun, José Luís Guterres no Ministra Finansas, Emília Pires. Primeiru-Ministru, Kay Rala Xanana Gusmão, hato’o diskursu abertura nian, tuir fali Sub-Sekretáriu-Jerál Nasoens Unidas no Konselleira Espesiál Sekretáriu-Jerál Nasoens Unidas nian sira ba Timor-Leste, Noeleen Heyzer, ne’ebé maka felisita Timor-Leste tanba ninia dezempeñu.
Planu Estratéjiku Dezenvolvimentu 2011-2030 (PED) fo-sai iha RPDTL tinan 2011 nian, hodi define enkuadramentu ba “tranzisaun Timor-Leste nian país ida ho rendimentu ki’ik ba fali país ida ho rendimentu médiu-altu ho populasaun ida ne’ebé saudável, bele lee no hakerek no moris ho seguransa, to’o 2030”. Iha sorumutuk 2013 nian fo-sai tiha ona Mekanizmu Koordenasaun kona-ba Polítika Dezenvolvimentu nian atuhodi fasilita implementasaun PED. Iha tinan 2014 partisipante sira hosi RPDTL nian afirma fila fali sira nia kompromisu atu servisu ho mekanizmu ida ne’e, hodi realiza sesaun sira atu hatama ba relatóriu kona-ba progresu setór estratéjiku haat ne’ebé identifika tiha ona maka: Ekonomia, Sosiál, Dezenvolvimentu Infraestrutura no Governasaun no Fortalesimentu Institusionál.
Iha loron daruak RPDTL nian tinan 2014 ne’ebé fó-sai Matrís PED nian, ferramenta ida ne’ebé dezenvolve tiha ona hosi Governu no Parseiru Dezenvolvimentu atuhodi motiva no garante implementasaun polítika ne’ebé estabelese ona. Matrís ne’e aloka responsabilidade no asegura responsabilizasaun liuhosi susesu hodi hetan meta sira iha setór estratéjiku haat. Delegadu sira ne’e adota ba Matrís PED nian no sira konkorda hodi aliña sira nia planu no orsamentu. Sira mós konkorda ona katak Governu Konstitusionál V, iha akordu ho parte sira ne’ebé mak iha interese, sei hetan revizaun ida kona-ba Planu Estratéjiku no Dezenvolvimentu ba tinan 2011-2030, ne’ebé sei aprezenta iha RPDTL iha tinan 2015.
Primeiru-Ministru, Kay Rala Xanana Gusmão agradese ba partisipante sira no hatudu nia laran haksolok ba sira ninia haka’as-an “iha servisu hamutuk ita bele hetan Dezenvolvimentu ida ne’ebé sustentável, kooperasaun internasionál ida ne’ebé pozitivu no futuru ida di’ak ba Povu Timor-Leste”.
Iha sorumutuk nia rohan fó sai Komunikadu ida.
