Sorumutuk Komité Konsertasaun Permanente da-175
Reprezentante ida-idak hosi Estadu-membru sira CPLP nian ne’ebé harii Komité Konsertasaun Permanente, sorumutu ohin, loron 21 fulan-Jullu, iha Ministériu Negósiu Estranjeiru no Kooperasaun iha Dili tuir sekuénsia serbisu ne’ebé halo parte iha Simeira CPLP nian mak Timor-Leste simu.
Sekretáriu Ezekutivu, Murade Isaac Murargy no Embaixadór Moçambique ba CPLP, Faizal Faquir Cassam maka prezide sorumutuk ne’e, konta mós ho prezensa Diretora-Jerál, Georgina Benrós de Mello no reprezentante tomak hosi nasaun hothotu ne’ebé tama iha Komunidade ne’e.
Embaixadór Faizal Faquir Cassam entrega pasta Koordenadór Komité Konsertasaun Permanente nian ba Embaixadór António de Araújo, reprezentante permanente Timor-Leste ba CPLP, rai ne’ebé sei asume Prezidénsia Rotativa durante tinan-rua tuirmai.
Komité Konsertasaun Permanente mak sei akompaña hodi haree katak Sekretariadu Ezekutivu implementa duni desizaun no rekomendasaun sira-ne’ebé orgaun CPLP sira-seluk publika ona. No Komité mós iha obrigasaun atu haree katak asaun sira-ne’ebé Institutu Internasionál Lian Portugés (IILP) halo, tuir duni orientasaun polítika jerál CPLP nian.
Komité Konsertasaun Permanente sorumutu, baibain, dala-ida iha fulan-ida nia laran no sei hala’o sorumutuk estraordinária bainhira presiza.
Iha Sorumutuk Komité Konsertasaun Permanente ba-175 ne’e, reprezentante sira hosi Angola, Brasil, Cabo Verde, Guiné-Bissau, Moçambique, Portugal, São Tomé e Príncipe no Timor-Leste sei halo análiza no haree fali dokumentu no proposta sira-ne’ebé sei hatama hodi hetan konsiderasaun hosi Ministru sira iha Sorumutuk Ordinária Konsellu Ministru da-XXIX, ne’ebé sei hala’o iha loron 22 fulan-Jullu iha Salaun Nobre Ministériu Negósiu Estranjeiru no Kooperasaun.
