Simeira Komunidade país Lian Portugés (CPLP) hahú iha semana oin iha Díli
Ministru Estadu no Prezidénsia Konsellu Ministru no
Porta-Vóz Ofisiál Governu Timor-Leste
Dili, loron 16 fulan Jullu tinan 2014
Simeira Komunidade país Lian Portugés (CPLP) hahú iha semana oin iha Díli
Líder internasionál sira sei mai iha Timor-Leste iha loron hirak oin mai atu partisipa iha Simeira ba Da-X (Da-sanuluk) Konferénsia Xefe Estadu no Governu CPLP nian sira. Reprezenta Estadu-membru sira CPLP nian mak Prezidente Cabo Verde, Moçambique, Portugal no São Tomé e Príncipe, Vise-Prezidente hosi Angola, Primeiru-Ministru sira hosi Portugal no Guiné-Bissau no hosi Ministru Relasaun Esteriór Brasil nian.
CPLP harii iha tinan 1996 hanesan fórum multilaterál ida atuhodi hakle’an liután relasaun amizade no koperasaun nian entre membru sira. CPLP forma hosi Estadu-membru sira na’in ualu, hamutuk ema besik millaun 240. Tinan ida ne’e, Timor-Leste simu responsabilidade ba Prezidénsia Rotativa CPLP nian, kargu ida ho ninia durasaun ba tinan rua. Prezidénsia ne’e sei entrega ofisialmente hosi Prezidénsia Moçambique nian ba Timor-Leste, ne’ebé sei hala’o iha loron Kuarta-feira.
Pontu ás liu Simeira nian, mak Konferénsia Xefe Estadu no Governu nian sira, ne’ebé sei hala’o iha Kuarta-feira, loron 23 fulan Jullu, ho tema “CPLP no Globalizasaun”. Primeiru-Ministru Timor-Leste nian, Kay Rala Xanana Gusmão, sei ko’alia kona-ba tópiku ida ne’e, hodi hato’o prioridade hirak kona-ba Prezidénsia Timor-Leste, ne’ebé mak atu kontinua lori ba oin servisu hirak ne’ebé hala’o tiha ona hosi Prezidénsia sira uluk, no inklui mós kooperasaun emprezariál no ekonómika, promosaun parseria sira no fahe teknolojia no koñesimentu.
Sorumutuk prinsipál hirak seluk, mak hanesan Sorumutuk Pontu Fokál sira Kooperasaun CPLP nian, iha loron 17 no 18 fulan Jullu, Komité Konsertasaun Permanente nian ba Da-175, iha loron 21 fulan Jullu, no Sorumutuk Ordinária Konsellu Ministrus nian ba Da-XIX iha loron 22 fulan Jullu, ne’e hotu halo parte mós ba Simeira CPLP nian.
Sorumutuk, fórun no eventu barbarak tan, sei hala’o iha semana oin mai, inklui mós semináriu ida kona-ba “Globalizasaun Ekonómika no Oportunidade ba Investimentu: CPLP no Rejiaun Ázia-Pasífiku”, iha loron 24 fulan Jullu, no Sorumutuk Parseiru Dezenvolvimentu Timor-Leste nian, iha loron 25 no 26 fulan Jullu, ne’ebé sei hala’o iha Sentru Konvensaun Díli nian.
Primeiru-Ministru Portugal nian sei hela iha Timor-Leste, hafoin Simeira liu tiha, atu hala’o vizita ofisiál ida.
