Ministériu Prezidénsia Konsellu Ministru, liuhusi Sentru Formasaun Téknika iha Komunikasaun (CEFTEC sigla iha lian portugés), iha loron 25 fulan Juñu, hala’o teste admisaun nian ida ba Formasaun Lian Portugés (iha nível báziku, intermédiu no avansadu) hanesan preparasaun ba eventu CPLP nian sira tuir mai.

Iha teste admisaun nian ne’ebé hala’o iha sala konferénsia Ministériu Prezidénsia Konsellu Ministru nian husi tuku 9 to’o tuku 17 ne’e, profisionál Administrasaun no protokolu nian, ofisiál média no jornalista sira hamutuk 134 maka partisipa.

Formasaun ida ne’e, ne’ebé sei hala’o iha fulan-Jullu to’o fulan-Outubru tinan 2014, ninia objetivu maka atu dezenvolve kompeténsia haat (Lee, rona, ko’alia no hakerek). Ninia intensaun atu  garante koñesimentu mínimu no importante sira liuliu ba profisionál sira ne’ebé envolve iha organizasaun Konferénsia Xefe Estadu no Governu CPLP nian ba Dala-Sanulu, iha Dili, no durante tinan rua ne’ebé Timor-Leste kaer knaar Prezidénsia Rotativa CPLP nian.

Rezultadu teste admisaun nian no klasifikasaun sira sei taka-sai iha Kuadru Avizu Ministériu Prezidénsia Konsellu Ministru nian ka liuhusi kontaktu telefóniku CEFTEC nian (3310003).

Tuir ajenda, formasaun ne’e sei hahú iha fulan Jullu, no fahe ba turma tolu, nível ida turma ida (báziku, intermédiu no avansadu) ho formandu hamutuk 18 ba kada turma. Formasuan ne’ebé profesór  sira husi Programa de Qualificação de Docente e  Ensino da Língua Portuguesa em Timor-Leste (PQLP-CAPES) mak sei hanorin ne’e, sei hala’o husi loron Segunda to’o loron Kinta, ho tempu oras ida ba turma ida-idak, iha Sala Formasaun CEFTEC nian, iha Palásiu Governu.

Bainhira formasaun ne’e remata, formandu sira ne’ebé hetan klasifikasaun “Exelente”,”Bom” ka “Suficiente” sei hetan sertifikadu ida husi PQLP/CAPES.