Govenu, liuhusi Ministériu Administrasaun Estatal, Jorge Conceição Teme, asina tiha ona iha loron 17 fulan Juñu, programa kooperasaun nian foun ida ho Programa Nasoins Unidas ba Dezenvolvimentu (PNUD) no ho Fundu Nasoins Unidas ba Dezenvolvimentu Kapitál (United Nations Capital Development Fund, UNCDF).

Programa Governasaun no Dezenvolvimentu Sub-Nasionál (PGDSN) foun ne’e dezeñadu atu kontribui ba hamenus kiak no ba dezenvolvimentu lokál.

Tuir Jorge da Conceição Teme, Programa Governasaun no Dezenvolvimentu Sub-Nasionál ninia durasaun ba tinan haat, husi tinan 2014 to’o tinan 2018, no sei sai hanesan kontributu ida iha implementasaun desentralizasaun iha teritóriu Timor-Leste laran tomak, no sei hadi’a mós partisipasaun no hasa’e tan kapasidade lokál iha prestasaun servisu.

Ministru hatutan tan, katak apoiu ne’e atu hodi tulun timoroan sira bele sai nu’udar autór ba dezenvolvimentu administrativu, iha nível sentrál ka nasionál. Oras ne’e dadaun Timor-Leste presiza aposta iha preparasaun rekursu umanu, naturál no finanseiru.

Noura Hamladji, reprezentante husi PNUD iha Timor-Leste, hatete katak programa konjuntu entre PNUD no UNCDF ida ne’e bazeia ba rezultadu husi Programa Apoiu Governasaun Lokál (Local Governance Support Programme, LGSP), liuliu ida ne’ebé mak iha realasaun ho tulun ne’ebé fó ba Governu iha dezenvolvimentu no implementasaun polítika no estratéjia desentralizasaun nian sira no mós liuhusi konsolidasaun no fortalesimentu planeamentu sub-nasionál kona-ba investimentu, finansiamentu no prosesu implementasaun nian sira.

Programa Governasaun Sub-Nasionál no Dezenvolvimentu (PGSND) sei implementa durante tinan haat, hahú husi loron 1 fulan Jullu 2014 to’o fulan Juñu 2018, ho orsamentu dolar amerikanu $17, 454,141.