Governu, liuhusi Ministériu Administrasaun Estatal (MAE), asina Memorandu Entendimentu ho ekipa ba Counterpart  International, iha 30 Maiu, iha MAE, atu implementa kooperasaun ba projetu ho naran “Bá Distritu”.

Projetu ne’e hetan  apoio husi Ajénsia Estadus Unidus ba Dezenvolvimentu Internasionál  (USAID) ho montante US$ millaun 6, durante tinan haat, to’o Setembru 2017.

Carolyn Tanner, xefe ekipa Counterpart  International hateten, projetu ne’e sei implementa iha suku 100 husi distritu 5 iha Timor-Leste, mak Baucau, Covalima no Oecusse. No tinan oin, sei extende ba distritu Ermera no Liquiça.

Objetivu implementasaun projetu ne’e, atu hametin governasaun lokál no hadi’a  asesu ba justísa, liuhusi kooperasaun besik ho Konsellu Suku sira, sosiedade sivíl no autoridade lokál, instituisaun justísa ka entidade legál sira.

“Liuhusi koperasaun ne’e, sei suporta Ministériu Administrasaun Estatál nia vizaun atu harii governasaun desentralizadu,” Carolyn Tanner hateten.

Programa “Bá Distritu” mós sei suporta ONG Belun atu hametin governasaun lokál no prosesu desentralizasaun, liuhusi hasa’e kapasidade Konsellu Suku, aumenta partisipasaun sidadaun sira no reprezentasaun iha governasaun local, hadi’a komunikasaun no ligasaun entre Konsellu Suku ho Administrasaun Distritu, liña ministériu no fornesidór servisu publíku baziku seluk iha nivel distritál.

“Bá Distrito” sei kria oportunidade ba lideransa komunitaria sira, no sira-nia povu hodi halibur hamutuk, buka solusaun ba dezafius ne’ebe sira identifika hamutuk no partisipa iha prosesu desentralizasaun ho proatívu.

Ministru  Administrasaun Estatál, Jorge Teme hateten, formasaun ne’ebé Konsellu Suku sira sei simu husi programa ne’e, bele motiva liutan ativu liu tan partisipaun iha dezenvolvimentu suku ida-idak. “Labele sai fali observadór, maibe tenki sai autór ba dezenvolvimentu,” Ministru afirma.