Delegasaun ida husi Timor-Leste ne’ebé Sekretáriu Estadu ba Asuntu ASEAN nian, Roberto Soares, maka lidera, partisipa iha Sorumutuk Altu Funsionáriu Forum Rejionál ASEAN nian (SAF FRA),iha loron 9 fulan Juñu tinan 2014, iha Myanmar.

Hanesan membru plenu Forum Rejionál ASEAN nian, delegasaun Timor-Leste partisipa iha SAF FRA, hodi troka opiniaun kona-ba asuntu rejionál no internasionál oioin hanesan disputa Tasi Súl Xina nian, no disputa Tasi iha Leste Xina nian, asuntu nulkleár, alterasaun klimátika, terorizmu no pirataria.

Iha simeira nia rohan, delegasaun ne’e mós hala’o sorumutuk ida ho Ministru-Adjuntu Negósiu Estranjeiru Repúblika Uniaun Myanmar nian U Thant Kyaw. Iha sorumutuk ne’e sira troka informasaun kona-ba prosesu dezenvolvimentu nasaun rua ne’e nian, hodi hatudu vontade atu haluan ámbitu kooperasaun bilaterál nian. Ministru-Adjuntu Negósiu Estranjeiru Myanmar hahi prosesu dezenvolvimentu Timor-Leste nian no tenik fali ninia apoiu tomak husi nia nasaun atu Timor-Leste tama ba grupu rejionál ASEAN nian.

Roberto Soares kongratula Prezidénsia ASEAN ne’ebé asume hosi Myanmar, no tau fiar maka’as no fó apoiu ba lideransa nasaun ne’e nian atu transforma lema prezidénsia Myanmar nian “Dalan atu hakat ba unidade ba Komuidade ida ne’ebé Pasífika no Próspera” sai realidade. Aleinde ida ne’e, Sekretáriu Estadu ne’e mós hahi Myanmar, ba ninia progresu ne’ebé maka’s iha tranzisaun ba demokrasia no ba reforma polítika hirak ne’ebé hala’o ona iha nasaun ne’e.

Reprezentante Timor-Leste nian ne’e hato’o mós ba partisipante sira kona-ba prosesu dezenvolvimentu nasaun ne’e nian no kona-ba ninia knaar iha grupu g7+, no mós asisténsia ne’ebé nia fó ba Guiné-Bissau hanesan parte husi diplomasia preventiva no esforsu sira atu rezolve konflitu sira iha rejiaun ne’e no mós iha rejiuan seluk. Aleinde ida ne’e, Roberto Soares informa kona-ba prezidénsia CPLP nian husi parte Timor-Leste. Tanba nu’udar nasaun ida husi Sudeste Aziátiku nian no membru ida husi CPLP, Timor-Leste sei kaer knaar importante ida hanesan ponte entre organizasaun rua ne’e.

Sekretáriu Estadu ba Asuntu ASEAN, Roberto Soares, akompaña husi Diretór Nasionál ba Asuntu ASEAN, Dirce Carolina, husi Konselleiru ba Asuntu ASEAN, Francisco Lemos dos Santos no husi jornalista/reporter ida husi TVTL, Francisco Marques Ricardo.