Ministru Estadu no Prezidénsia Konsellu Ministru no
Porta-Vóz Ofisiál Governu Timor-Leste
Díli, loron 2 fulan Juñu tinan 2014
Primeiru-Ministru hetan nomeasaun ba Konsellu Konsultivu g7+ nian durante ninia Vizita Ofisiál ba Togo
Primeiru-Ministru Timor-Leste, Kay Rala Xanana Gusmão, hetan nomeasaun, ho votu iha unanimidade, ba Konsellu Konsultivu g7+ nian, durante Sorumutuk Ministeriál da-3 g7+ nian ne’ebé hala’o iha Lomé, Togo. Konsellu Konsultivu harii ho hanoin ida atubele sai hanesan grupu ida ne’ebé hala’o knaar Harri Dame no Estadu ne’ebé bele orienta g7+, no, bainhira situasaun ezije, bele sai hanesan promotór no mediadór. Primeiru-Ministru mak ema dahuluk ne’ebé hetan nomeasaun ba Konsellu ne’e.
Iha sorumutuk ne’ebé hala’o iha loron 29 no 30 fulan Maiu nian, Timor-Leste hakotu ona ninia knaar hanesan Prezidente g7+ nian, no hili Serra Leoa hanesan Prezidente foun. Serra Leoa sei reprezenta husi ninia Ministru Finansas no Dezenvolvimentu Ekonómiku, Kaifala Marah. Ministru sira g7+ nian ne’ebé mai iha sorumtuk ne’e hato’o sira nia agradesimentu ba Timor-Leste nia haka’as-an no empeñu hodi kria no kondús grupu ne’e iha tinan haat uluk husi ninia istória, no hahii ba knaar husi Prezidente sesante, Emília Pires no orientasaun husi Primeiru-Ministru Xanana Gusmão. Grupu ne’e hili ona Ministra Emília Pires hanesan Enviada Espesiál g7+ nian no konvida ona nia atu kontinua iha kargu Nivel Aas nian ida, ne’ebé dedika ba área advokasia no edukasaun nian.
Durante ninia vizita ba Togo Primeiru-Ministru hala’o sorumutuk bilaterál ho Prezidente Togo, Faure Essozimna Gnassingbé, no Primeiru-Ministru Togo, Arthème Séléagodji Ahoomey-Zunu. Iha sorumutuk ne’e diskute kona-ba relasaun bilaterál entre Togo no Timor-Leste, ko’alia kona-ba dame, nahe-biti boot (rekonsiliasaun), dezenvolvimentu no jestaun rekursu naturál.
Molok vizita Togo Primeiru-Ministru, ne’ebé kaer mós knaar Ministru Defeza no Seguransa nian, hala’o vizita serbisu ida ba Portugal no partisipa iha Sorumutuk da-15 Ministru Defeza Komunidade País Lian Portugés (CPLP) nian. Xanana Gusmão husik ona Togo no iha hela dalan ba Guiné Equatorial, São Tomé e Príncipe, Guiné-Bissau no Cabo Verde, molok fila mai Timor-Leste. Vizita ba nasaun sira-ne’e fó-dalan ba Primeiru-Ministru hodi haburas liután lasu-amizade no hato’o ba Xefe Governu no Xefe Estadu ida-idak kona-ba sorumutuk sira-tuirmai iha Dili, bainhira Timor-Leste simu knaar prezidénsia CPLP niana, iha fulan-Jullu. Guiné-Bissau no São Tomé e Príncipe mós hanesan membru g7+ nian.
Primeiru-Ministru no ninia komitiva sei fila mai Timor-Leste iha loron 13 fulan Juñu.