Ministériu Edukasaun organiza sorumutu nivel ensinu superior ho nasaun viziñu Austrália, ne’ebé partisipa hosi Charles Darwin Univercity, no Indonézia, Universidade Udayana Bali, no Timor-Leste nian partisipa hosi Universidade Nasionál Timor Loro Sa’e (UNTL). Objetivu hosi sorumutu ne’e mak atu hametin dezenvolvimentu edukasaun nivel ensinu superior sira iha nivél rejiaun no sub rejionál. Sorumutu ne’e halo iha Dili, segunda-feira, loron 5 Maiu.
Ministru Edukasaun, Bendito Freitas, hateten, Universidade nia papél la’ós atu hanorin de’it valores sientífiku, maibe forma mós sidadaun ne’ebé ho hanoin atu deskobre ka halo peskiza kle’an kona-ba nesesidade rejionais, dezenvolvimentu ekonómiku, dezenvolve umanu, interpendénsia ema ho ema no teknolojia informátika.
“Siénsia teknolojia nia papél boot tébes iha mundu, maibé, fortifika informasaun labele lakon sentidu umanizmu. Tanba ne’e, sidadaun globál ne’e konsiente ba realidade atuais, jeográfika, polítika no kulturais. Hein katak, matenek na’in sira iha sorumutu ne’e, bele prodúz konsetu ruma ba universidade sira atu halo peskiza iha sub rejionál,” Ministru Bendito dehan.
Reitór UNTL, Aurélio Guterres hateten, finalidade husi sorumutu ne’e mak oinsá hamutuk ho Austrália no Indonézia, halo kooperasaun ba futuru, liuliu iha sub rejionál, atu ko’alia kona-ba páz no estabilidade atu hametin dezenvolvimentu.
Oras ne’e, estudante balun hala’o dadaun ona peskiza. No iha futuru, sei hare opurtunidade ba estudante Austrália, Indonézia no Timor-oan halo atividade hamutuk, foka liu ba páz, estabilidade no sidadania. “UNTL prontu ba forum ida-ne’e,” Aurélio hatutan.
Entertantu, Dr. Muhammad Najib Azca hanesan Vise Dekanu Bidang Penelitian dan pengabdian kepada masyarakat, konsidera forum ne’e importante atu dezenvolvimentu universidade iha sub rejionál iha sub rejionál, entre Timor-Leste, Indonézia no Austrália.
Partisipa mós iha sorumutu ne’e reprezentante husi Universidade Gaja Mada no Satya Wacana husi Yogyakarta hodi kompartilla mós sira nia esperensia, liuliu kona-ba dezafius iha rejiaun, atu bele forma sidadaun globál.