Sorumutuk Konsellu Ministru nian loron 27 fulan Maiu tinan 2014
Prezidénsia Konsellu Ministrus
V Governu Konstitusionál
..............................................................................................................................
Díli, Loron 27 Fulan Maiu Tinan 2014
Komunikadu Imprensa
Sorumutuk Konsellu Ministru nian loron 27 fulan Maiu tinan 2014
Governu Konstitusionál V hala’o sorumutuk loron-tersa ne’e, loron 27 fulan Maiu tinan 2014, iha sala sorumutuk Konsellu Ministru nian, iha Palásiu Governu, Dili, no aprova ona:
1. Dekretu ne’ebé aprova Kuadru Pesoál Karreira Ministériu Públiku nian
Dekretu Governu ne’ebé ohin Konsellu Ministru aprova buka atu atualiza kuadru pesoál karreira Ministériu Públiku, iha ne’ebé maka define ona númeru husi fatin sira ne’ebé iha ba kategoria karreira ida-idak, hanesan prevee ona iha Estatutu Ministériu Públiku nian.
Diploma ida ne’e kontribui ba enkuadramentu ne’ebé di’ak liu kona-ba kompeténsia sira Ministériu Públiku nian, hametin prinsípiu irarkia nian iha organizasaun laran no insentiva melloria kualidade husi ninia servidór sira. Buat sira-ne’e hotu sei hatudu liuhusi prestasaun ida ne’ebé di’ak husi servisu justisa nian sira, iha Ministériu Públiku nia responsabilidade, no iha asesu ne’ebé di’ak husi sidadaun timoroan sira ba justisa no ba direitu.
Konsellu Ministru analiza mós:
1. Dekretu-Lei ne’ebé Harii Komisaun Nasionál Organizasaun Nasoins Unidas ba Edukasaun, Siénsia no Kultura (UNESCO) Timor-Leste
Konsellu Ministru haree didi’ak ona aprezentasaun Dekretu-Lei, husi Ministériu Edukasaun nian, kona-ba kriasaun Komisaun Nasionál Organizasaun Nasoins Unidas ba Edukasaun, Siénsia no Kultura (UNESCO) Timor-Leste, hodi adia ninia aprovasaun ba sorumutuk tuirmai.
