Ofisiál téknika sira entre Governu Timor-Leste ho Governu Republika Indonesia, realize sorumutu kooperasaun téknika ba daruak iha semana ikus fulan abril nian, 27-28 Abril 2014 iha Bali, hodi ko’alia kona-ba progresu signifikativu sira iha relasoins bilaterais entre RDTL e RI bazeia ba resultadu sira hosi “SOM-Scorecard” ne’ebé realiza iha Dili iha tinan 2013 nian. Delegasaun Timor-Leste nian xefia hosi, señor João Freitas da Câmara, Diretór-Jerál Relasaun Externa, MNEC no Delegasaun Indonesia nian, xefia hosi, Agus Sriyono, Adjuntu Koordenadór Ministériu Polítika, Legál no Seguransa Externa.
Iha Sorumutu ne’e fahe grupu traballu neen, hodi haree no diskute kona-ba area prioridade sira iha kooperasaun bilaterál nian, hanesan; grupo traballu Asuntu Fronteira ho Grupo Asuntu Legál no Judisiál nian, xefia hosi Diretór Nasionál Asuntu Bilaterál Ministériu Negósius Estranjeirus no Kooperasaun (MNEK), Marcos da Costa, grupo traballu Komersiu, Investimentu no Finanseiru, xefia hosi Diretór-Jerál, Ministériu Komérsiu Indústria no Ambiente, Cosme da Silva, grupo traballu Transporte Telekomunikasaun no Obras Publikas xefia hosi Diretór Jerál Ministériu Transporte no Telekomunikasaun, Fernando Carvalho da Cruz, grupo traballu Agrikultura, Floresta no Peskas xefia hosi Diretór-Jerál MAP, Lourenço Fontes no grupu tranballu Asuntu Sosiál, Edukasaun no Kultura xefia hosi Diretór Jerál, Ensinu Superiór, Ministériu Edukasaun, Abrão dos Santos.
João Freitas Câmara, xefe delegasaun Timor-Leste hatete katak, sorumutu tékniku ida ne’e atu haree fila fali kooperasaun tékniku ne’ebé hala’o ona entre Repúblika Indonézia ho Timor-Leste, aleinde ne’e, halo mós evaluasaun hodi halo kontinuasaun no fahe informasaun ba malu kona-ba SOM Scorecard ne’ebé mak hala’o tiha ona iha tinan kotuk, iha Díli, tinan ne’e Indonézia mak lidera fali sorumutu ne’e iha Bali, Indonézia, tanba ne’e asuntu sira ne’ebé mak levanta iha plenária ne’e rejistu pontu balun ne’ebé mak grupu traballu ida-idak hetan to’o sira implementa ona no balun sei iha prosesu nia laran, hein hodi bele hala’o kooperasaun di’ak liu tán ba futuru.
Adjuntu Koordenadór Ministériu Polítika, Legál no Seguransa Externa, Indonézia, Agus Sriyono haktuir katak, orgullu tébes, lidera enkontru ne’e ho Timor-Leste, nune’e halo mós evaluasaun ba Vizita Prezidente, Taur Matan Ruak mai iha Indonézia iha loron 21, fulan Juñu, tinan 2013, iha vizita ne’e Prezidente Repúblika Timor-Leste no Indonézia hatudu kompromisu boot ne’ebé Prezidente nain rua sai sasin ba Ministru Negósius Estranjeirus Indonézia no Timor-Leste asina dokumentu tolu ne’ebé sei benefisia povu rai rua ne’e.
Dokumentu dahuluk mak hanesan, ajenda akordu profesionál entre Governu Timor-Leste ho Indonézia iha akordu fronteira trestres, viza gratuita ba pasaporte diplomátiku no MoU Diplomatika ba Edukasaun no kooperasaun ba trainamentu no ba oin iha hanoin mós kona-ba teknolojia komunikasaun Fiber optic cable, Stabelesementu sentru kultura Timor-Leste.
“Ita nia sorumutu ikus SOM-scorecard meeting iha Díli tinan 2013, nia rezultadu ne’e susesu no produtivu tébes, delegasaun hosi Indonézia no Timor-Leste konsege alista ona prioridades no servisu sira ne’ebé sei adia tuir mapa servisu ne’ebé konkorda ona hamutuk entre Indonézia ho Timor-Leste, tenik xefe delegasaun Indonésia”, Agus hateten.
Iha plenaria enseramentu sorumutu ofisiál teknika Nasaun rua nian ne’e, deside ona Sorumutu teknika SOM-Scorecad tuir mai sei realiza iha Díli, Timor-Leste.