Sorumutuk Konsellu Ministru nian loron 13 fulan Maiu tinan 2014
Prezidénsia Konsellu Ministrus
V Governu Konstitusionál
..............................................................................................................................
Díli, Loron 13 Fulan Maiu Tinan 2014
Komunikadu Imprensa
Sorumutuk Konsellu Ministru nian loron 13 fulan Maiu tinan 2014
Governu hala’o sorumutuk iha loron tersa ne’e, loron 13 fulan Maiu tinan 2014, iha sala sorumutuk Konsellu Ministru nian, iha Palásiu Governu, iha Dili no aprova ona:
1. Dekretu-Lei ne’ebé aprova Orgánika Prezidénsia Konsellu Ministru nian
Ministru Prezidénsia Konsellu Ministru aprezenta Dekretu-Lei kona-ba Orgánika ne’ebé buka atu adopta estrutura ida ne’ebé hanesan ho ministériu ida nian, maske iha espesifisidade balu tanba ninia karaktéristika sira ne’ebé liga ba administrasaun estrutura Governu nian, no haree mós tanba nia fó tutela ba númeru membru Governu nian ida ne’ebé boot liu fali husi ida ne’ebé baibain ministériu sira iha.
Nune’e, Prezidénsia Konsellu Ministru (PKM) sei iha estrutura servisu administrativu nian ida de’it, maske membru Governu sira ne’e ida-idak hetan tutela husi servisu sira ne’ebé foka diretamente liu ba kumprimentu mandatu hirak ne’e.
Orgánika ne’ebé foin aprova ne’e kria figura Sekretáriu-Jerál ne’ebé sei iha kompeténsia atu tau-matan ba atividade administrasaun nian husi servisu sira Prezidénsia Konsellu Ministru nian.
Konsellu Ministru analiza mós:
1. Aprezentasaun Programa no Projetu ne’ebé Banku Mundiál dezenvolve ona no/ka hetan apoiu husi nia
Banku Mundiál aprezenta ona rezumu badak ida kona-ba servisu no projetu ne’ebé nia apoia to’o oras ne’e no ninia estratéjia parseria nian ba tinan 2014-2018. Grupu Banku Mundiál, ne’ebé iha ona Timor-Leste dezde tinan 1999, la’ós de’it finansia projetu sira maibé apoia mós ninia implementasaun. Ninia estratéjia ba tinan-haat oin mai sei hatuur, liuliu, iha área kapitál sosiál, infraestrutura sira no dezenvolvimentu ekonomia nian.
2. Aprezentasaun Relatóriu Anuál kona-ba Atividade sira iha tinan 2013 husi Komisaun Funsaun Públika nian
Relatóriu kona-ba Atividade Anuál tinan 2013 nian ne’ebé Komisaun Funsaun Públika (KFP) aprezenta ona, organiza tuir liña haat ne’ebé orienta Planu Asaun Anuál ba tinan ne’ebé refere: lidera jestaun no dezempeñu Funsaun Públika; hadi’a kuadru jestaun serbisu Funsaun Públika nian; dezenvolve no sustenta kapasidade funsionáriu públiku sira no harii kapasidade Funsaun Públika nian.
Nune’e, relatóriu ne’e halibur dadús kona-ba atividade sira-ne’ebé dezenvolve ona no mós rezultadu sira husi área atuasaun KFP nian sira.
