Sekretáriu Estadu Defeza, Júliu Tomás Pinto, hamutuk ho Xefe Estadu-Maiór Jenerál F-FDTL, Majór-Jenerál Lere Anan Timur, iha loron 24 fulan Abríl simu delegasaun Indonézia nian, ne’ebé xefiada husi Majór-Jenerál Hartind Asrin.

Vizita delegasaun Indonézia nian ne’e ninia objetivu mak atu hala’o sorumutuk bilaterál ida ba implementasaun Akordu iha área Defeza nian, ne’ebé asina iha tinan 2011 entre Estadu rua, ne’ebé konsidera área oin-oin ne’ebé rekursus-umanus F-FDTL nian bele hetan treinu atu nune’e bele aumenta sira nia kapasidade no halo sira sai profisionál liután.

Tuir Júlio Tomás Pintu, formasaun ne’ebé Timor-Leste presiza liuliu mak iha área enjeñaria nian, entre seluseluk ne’ebé sei diskute hamutuk, no bele iha posibilidade atu kooperasaun ne’e hahú ona iha tinan 2015.

Tuir Diretór-Jerál Sekretaria Estadu Defeza nian, ne’ebé mai mós iha sorumutuk bilaterál ne’e, “Indonézia sei fasilita treinu no kursu formasaun iha tempu badak, médiu no naruk, ba membru F-FDTL no Sekretaria Estadu Defeza nian sira”, no dehan mós katak, tanba iha kursu iha área oinoin de’it, Sekretaria Estadu Defeza maka tenke define hirak ne’ebé de’it maka prioritáriu liu.

Dauduan ne’e kursu ida hala’o hela iha LEMHANNAS (Institutu Nasionál Rezilénsia Indonézia nian)” ba ida ne’e Timor-Leste haruka ba ona ofisiál superiór ida, no iha tempu liubá iha ona ema na’in rua maka ramata tiha ona formasaun iha ne’ebá.