Tuir Rezolusaun Governu nian n.º 8/2014, loron 31 fulan Marsu, ne’ebé mak Governu fó apoiu hodi hala’o operasaun konjunta Forsa Seguransa PNTL no Forsa Defeza (F-FDTL) nian sira atu hodi estabelese hikas fali estabilidade públika iha Laga, Quelicai, Baguia no Wato-Lari, hatudu katak grupu illegál sira ne’ebé provoka instabilidade iha nasaun laran no ameasa seguransa nasionál desloka fali ba fatin seluk ne’ebé la temi iha rezolusaun ne’e.

Iha sorumutuk estraordináriu Konsellu Ministru nian, iha sesta feira loron 2 fulan Maiu, Governu hakarak hanaruk tan atuasaun Forsa sira nian iha territóriu nasionál tomak, to’o loron 17 fulan Maiu tinan 2014, atu bele garante efikásia ba operasaun konjunta nian, Forsa sira bele halo atuasaun iha ne’ebé de’it ba movimentu grupu illegál sira nian.

Ho medida ida ne’e, Governu hakarak asegura garantia, promosaun no sidadaun sira hotu-hotu bele goza sira nia direitu no liberdade fundamentál sira, hanesan mós orden públika no disiplina sosiál.