Governu Timor-Leste

Prezidénsia Konsellu Ministrus

V Governu Konstitusionál

..............................................................................................................................

Díli, Loron 29 Fulan Abril Tinan 2014

Komunikadu Imprensa

Sorumutuk Konsellu Ministru nian loron 29 fulan Abríl tinan 2014

 

Governu Konstituisionál V hala’o sorumutu iha loron tersa-feira ne’e, loron 29 fulan Abríl tinan 2014, iha sala sorumutuk Konsellu Ministru nian, iha Palásiu Governu, iha Dili, no aprova ona:

1. Proposta Lei ne’ebé aprova Estatutu Rejiaun Oe-cusse Ambeno no Ataúro

Proposta lei ne’ebé hetan aprovasun husi Konsellu Ministru determina prinsípiu sira kona-ba Rejiaun Administrativa  Espesiál Oe-cusse Ambeno, iha ne’ebé sei implementa projetu-pilotu Zona Espesiál Ekonomia Sosiál Merkadu nian (ZEESM). Kriasaun Rejiaun Administrativa Espesiál Oe-cusse Ambeno ninia hakarak maka atu ida ne’e bele sai hanesan rejiaun administrativa lokál ida, ne’ebé hetan autonomia administrativa, finanseira no patrimoniál, ne’ebé ninia objetivu maka dezenvolvimentu inkluzivu rejiaun ne’e nian hodi fó prioridade ba atividade sira husi aspetu sósiu-ekonómiku no ninia benefísiu sei fila hikas ba komunidade.

Tuir Proposta lei ne’e, rai-ketan Ataúro hetan estatutu hanesan polu komplementár ba Rejiaun Administrativa Espesiál Oe-cusse Ambeno, iha área turizmu nian.

ZEESM importante atu to’o ba objetivu sira husi dezenvolvimentu rejionál, hodi kria zona estratéjika nasionál ne’ebé bele dada investidór nasionál no mós husi rai-li’ur nian sira. Ninia objetivu maka hasai tiha estatutu enklave nian husi Oe-cusse Ambeno no fó ba nia estatutu pólu dezenvovimentu nasionál, sub-rejionál no rejionál, no iha ámbitu pólu ida ne’e nian Ataúro sei hetan fatin liubá turizmu integradu.

2. Projetu Dekretu-Lei ne’ebé aprova Prosesu Lisensiamentu, Esplorasaun no Kontrolu Atividade sira husi Jogu Sosiál Diversaun nian no Jogu Tradisionál sira

Diploma ida ne’e estabelese norma no kondisaun hirak ne’ebé tenki tuir prosesu lisensiamentu, esplorasaun no kontrolu kona-ba atividade sira husi jogu sosiál no jogu diversaun nian sira, mákina jogu nian no jogu tradisionál sira.

Matéria hotu-hotu kona-ba jogu sira ne’e tenke konsidera ona hanesan interese públiku tanba ninia potensialidade no insidénsia sosiál, administrativa no tributária sira tanba ne’e maka regulamentasaun matéria ida ne’e nian hakarak reformula no estabelese sistema kontrolu nian ida ne’eb’e adekuadu liu kona-ba atividade husi jogu sira, hodi fó atensaun ba konsesionáriu sira ne’ebé hakarak investe no hodi asegura direitu no obrigasaun sira husi ema hirak ne’ebé halimar jogu sira ne’e.

3. Dekretu-Lei ne’ebé aprova Estatutu husi Karreira Rejime Espesiál husi Auditór sira Kámara Kontas Tribunál Superiór Administrativu, Fiskál no Kontas

Konsellu Ministru aprova ona Dekretu-Lei ne’ebé aprova Estatutu husi Karreira Rejime Espesiál Auditór sira Kámara Kontas Tribunál Superiór Administrativu, Fiskál no Kontas nian ne’ebé aprezenta husi Ministériu Justisa.

Karreira espesiál auditór sira nian, ne’ebé la eziste iha kuadru legál funsaun públika nian, justifika ho nesesidade atu instituisaun superiór ba kontrolu kona-ba konta sira Estadu nian atu iha kuadru pesoál apoiu nian ida ho kualifikasaun espesiál ne’ebé bele fó dalan ba nia hala’o ninia funsaun sira ho efikáz.

Nune’e, aprovasaun diploma ida ne’e nian, hodi kumpri ba artigu da-24 husi Lei 9/2011, loron 17 fulan Agostu, ne’ebé aprova orgánika instituisaun ida ne’e nian, ne’ebé atribui ba Governu kompeténsia atu regula hosi Dekretu-Lei estatutu pesoál servisu apoiu tékniku nian.

4. Rezolusaun Governu nian ne’ebé aprova Akordu ba Estabelesimentu Sekretariadu Rejionál ba Inisniativa kona-ba Triángulu Korál ba Resife Korál nian, no Seguransa Alimentár

Rezolusaun Governu nian ne’ebé Konsellu Ministru ohin aprova tiha ona hakarak estabelese Sekretariadu Rejionál ida ba Inisiativa kona-ba Triángulu Korál ba Resife Korál nian, Peska no Seguransa Alimentár, atubele proporsiona efisiénsia ida ne’ebé boot liu iha prosesu koordenasaun kona-ba implementasaun husi  inisiativa ida ne’e iha nível rejionál.

5. Dekretu Governu nian ne’ebé aprova Orgánika husi Unidade Misaun ba Dezenvolvimentu Ekonómiku Sub-Rejionál Integradu

Rezolusaun Governu n^u 20/2013, loron 11 fulan Setembru, rekoñese importánsia husi konstituisaun Unidade Misaun ad hoc ida ne’ebé importante, iha diresaun no supervizaun direta hosi Primeiru-Ministru, ho objetivu atu implementa plataforma ida kona-ba Dezenvolvimentu Ekonómíku Sub-Rejionál Integradu entre Timor-Leste, Indonézia parte leste no Austrália parte norte.

Aprovasaun  ba Dekretu Governu nian ida ne’e kria Unidade Misaun ad hoc ba Dezenvolvimentu Ekonómiku Sub-Rejionál Integradu, estabelese ninia estrutura orgánika no atribuisaun.

Konsellu Ministru halo mós análize kona-ba:

1. Relatóriu kona-ba Misaun Apoiu  ba Prosesu Eleitorál Giné-Bisau II

Sekretáriu Estadu Desentralizasaun Administrativa, Tomás Cabral, ne’ebé sai mós nu’udar Xefe Misaun Apoiu nian ba Prosesu Eleitorál iha Giné-Bisau, aprezenta ona iha Sorumutuk Konsellu Ministru nian, relatóriu kona-ba Misaun II, ne’ebé hala’o husi loron 1 fulan Fevereiru to’o loron 17 fulan Abríl. Xefe Misaun ne’e aprezenta rezumu ida husi atividade pré-eleitorál ne’ebé hala’o liuhusi formasaun eleitorál, husi servisu informasaun teknolójika, jurídiku no lojístika; husi atividade iha loron eleisaun nian hanesan votasaun antesipada no votasaun ba sira ne’ebé hela iha nasaun seluk; no husi atividade iha períodu pós-eleitorál. Iha atividade sira ikus ne’e inklui mós Misaun Obeservasaun nian sira, entre hirak ne’e maka Misaun Observasaun Eleitorál Timor-Leste nian, no kona-ba misaun ne’e Sekretária Estadu Asuntu Parlamentár, Maria Teresinha Viegas, hato’o mós ba Konsellu-Ministru.

2. Zero Hunger Challenge (ZHC)

Ministériu Agrikultura no Peska aprezenta ba Konsellu Ministru inisiativa “Zero Hunger Challenge – ZHC” ne’ebé hakerek mós dadus kona-ba situasaun nasionál seguransa alimentár nian no nutrisaun, no mós prosesu kona-ba formasaun Planu Asaun Nasionál ba área ne’e.

3. Dekretu-Lei ne’ebé Estabelese Baze Polítika Turizmu nian

Konsellu Ministru ko’alia kona-ba Dekretu-Lei ne’ebé Estabelese Baze husi Polítika Turizmu nian ida,  ne’ebé aprezenta husi Ministériu Turizmu, no Dekretu-Lei ne’e maka determina baze sira husi polítika turizmu nian, define objetivu no prinsípiu hirak ne’ebé submete ba nia no identifika instrumentu hirak ne’ebé destinadu ba ninia ezekusaun, nu’udar sektór estratéjiku ekonomia nasionál nian, hodi husik hela nia aprovasaun ba sorumutu tuirmai.