Governu Timor-Leste

Ministériu Obras Públikas (MOP), liu hosi Diretór Jerál Obras Públikas, José Piedade akompaña hosi Diretór Diresaun Nasionál Estrada, Ponte no Kontrolu Xeias, Rui Hernani, iha semana ikus fulan Marsu  iha edifisiu Ministériu Obras Públikas, Mandarin, Díli, hala’o avaliasaun servisu ho kompañia nasionál sira, ne'ebé mak reabilita estrada Díli laran.

Rui Hernani esplika objetivu sorumutu ne’e, atu hametin servisu no koordenasaun entre kompaña sira ho Obras Públikas, nomeia supervisór ba trosu 10, ne’ebé reabilita iha estrada Díli laran no empreza sira ne’ebé responsavél ba kada trosu nomeia site manager, atu dezenvolve koordenasaun di’ak ho tékniku MOP.

“Husu atu kompañia sira halo servisu ho metódu, atu nune’e buat hotu la’o ho di’ak tuir dezeñu hosi departamentu dezeñu obras públikas, padraun tékniku ho kualidade de’iak”, diretór Rui Hernani dehan.

Entretantu Xefé Departamentu Laboratóriu no Peskiza, Saturnino Gomes informa, laboratóriu no peskiza iha ekipa ida ba akompaña projetu ne’e. “Husu atu konstrusaun ne’ebé halo, obedese ba teste laboratóriu matéria sira, hanesan alkatraun”, Saturnino Gomes informa.

Reprezentante kompañia sira, Diretór Kompañia Tinolina, Agostinho Gomes informa, projetu ne’e karatér urjente no prontu koordena ho Obras Públikas no departementu sira hotu, atu garante servisu di’ak no ho kualidade.

Trosu estradas iha Díli laran hamutuk 10, mak iha hela rehabilitasaun, atu prepara kondisaun ba eventu importante rua tinan ne’e, mak komemorasaun loron Restaurasaun Independensia, 20 Maiu 2014 no Simeira Xefe Estadu no Governu nian Comunidade dos Países de Língua Portuguesa (CPLP), fulan Jullu 2014.