MOP sobu rehabilitasaun estrada ne’ebé la kualidade
Ministériu Obras Públikas (MOP) iha 3 Abril 2014 hasai orden ba ekipa tékniku ministériu nian, sobu fali projetu rehabilitasaun estrada ho metru 250, ne’ebé liga area Bidau to’o Banku ANZ, Dili, tanba kualidade ladún di’ak.
Ministru Obras Públikas, Gastão de Sousa, informa, iha servisu projetu ne’e, Kompañia JONIZE uza alkatraun ne’ebé la tuir espifikasaun husi MOP. “Kompania JONIZE fui alkatraun ba estrada ho kualidade la di’ak, tanba temperatura boot liu, kuaze grau 250,” Ministru Gastão, hateten.
Ho temparatura ne’e, Ministru hatutan, estrada refere sei la dura ba tempu naruk. “Husu ba kontratór tomak, atu labele halimar ho servisu. Hot-hotu hakarak halo estrada ho kualidade di’ak, hodi dura ba tempu naruk no benefísia povu iha rai ne’e, Ministru Obras Públikas dehan tan.
Empreza sei tau hikas fali alkatraun ba estrada, tuir ezigénsia ba padraun husi Ministériu Obras Públikas.
