Governu Timor-Leste

Konsellu Ministru hakotu ona, iha sorumutuk estraordináriu, iha loron-kuarta ne’e, loron 2 fulan Abríl, atu fó apoiu ba Komandu husi Falintil Forsa Defeza Timor-Leste (F-FDTL) no Polísia Nasionál Timor-Leste (PNTL) iha sira nia miasaun atu salvaguarda orden konstitusionál demokrátika.

Empeñamentu operasionál husi Forsa Seguransa no husi Forsa Defeza nian hetan aprovasaun husi Governu (Rezolusaun Governu nian n.^u 8/2014) atu estabelese fila-fali estabilidade públika iha Laga, Quelicai, Baguia no Wato-Lari. Medida ida ne’e foti depoizde atake armada ida ba PNTL, iha loron 10 fulan Marsu, iha distritu Baucau, durante asaun polisiamentu komunitáriu atu kontrola grupu ilegál sira (hodi kumpre Rezolusaun Parlamentu Nasionál nian n.^u 5/2014, loron 3 fulan Marsu).

Tanba Estadu tomak iha obrigasaun atu garante salvaguarda husi orden konstitusionál demokrátika, Sekretaria Estadu Defeza no Sekretaria Estadu Seguransa aprezenta ona ba Konsellu Ministru – ho apoiu husi Parlamentu Nasionál no aprovasaun husi Prezidente Repúblika – solusaun ida kona-ba intervensaun integrada atu hasoru situasaun ida ne’e, ne’ebé delikadu ba Estadu, ba órgaun soberania nian no ba pás sosiál populasaun nian.

Tanba Governu mak iha kompeténsia atu foti medidade hirak ne’ebé presiza ba garantia, promosaun no gozu direitu no liberdade fundamentál sira sidadaun hotu-hotu nian, no mós atu asegura orden públika no dixiplina sosiál, pilár báziku sira ba manutensaun husi normalidade konstitusionál no sentimentu seguransa populasaun sira nian, Konsellu Ministru hakotu hodi fó apoiu ba empeñamentu husi F-FDTL no husi PNTL atu previne kualkér foku instabilidade nian.