SEPFOPE no PALOP kapasita formandu hosi sentru formasaun sira
Sekretaria Estadu Polítika Formasaun Profisionál no Empregu (SEPFOPE) halo abertura ba asaun formasaun kona-ba Empriendedorizmu Iha Ekonomia Kreativa, iha Sentru Nasionál Empregu no Formasaun Profisionál, Tibar, iha loron 10 Marsu 2014. Partisipante sira hamutuk na’in 28, mai husi sentru hotu no sira ne’ebé iha interese atu hadi’a negósiu.
Formasaun ne’e realiza tanba SEPFOPE servisu hamutuk ho PALOP (Nasaun Áfrika sira ho lian ofisiál Portugués) ho apoiu hosi Uniaun Europeia.
Formadór sira mai husi nasaun Cabo Verde no Uniaun Europeia. Asaun Formasaun sei remata iha loron 21 Marsu 2014.
Diretór-Jerál SEPFOPE, Jacinto Barros Gusmão, haktuir katak, formasaun kona-ba empriendedorizmu iha Timor-Leste la’o tiha ona ho naran kriasaun empregu ka auto-empregu.
“Ida ne’e importante ba Timor-Leste, atu servisu hamutuk hodi haree padraun ida iha PALOP no Europa, atu bele fó servisu ka kriasaun servisu ba maluk dezempregadu sira,” Diretór-Jerál hateten.
Embaixadora União Europeia iha Timor-leste, Sylvie Tabess, hateten katak, impelementasaun projetu iha nasaun PALOP sira, inklui Timor-Leste, atu benefísia no favorese auto-emprego no liuliu iha indústria kriativa sira. “Ne’e importante tébes ba foin-sae sira iha Timor-Leste,” Embaixadora Sylvie Tabess dehan.
