Governu Timor-Leste

Ministru Estadu no Prezidénsia Konsellu Ministrus, reprezenta Governu Timor-Leste nian, no Reprezentante Rezidente hosi programa Nasões Unidas nian ba Dezenvolvimentu (PUND), Knut Ostby, iha loron 14 fulan Marsu, asina, Akordu ida hodi fahe kustus ba apoiu iha estrutura Pré-Deskonsentrasaun Administrativa iha sala konferénsia Prezidénsia Konsellu Ministrus nian.

Iha Akordu ne’e, Governu sei kontribui hó dólar amerikanu rihun $750 hodi fó kontinuidade ba polítika no dezenvolvimentu programa ne’ebé mak hetan apoiu hosi PNUD hamutuk ho Ministériu Administrasaun Estatál, Sekretaria Estadu Desentralizasaun Administrativa no Sekretaria Estadu ba Fortalesimentu Institusionál.

Estrutura hirak hosi Pré- Deskonsentrasaun Administrativa nian tenke asegura tuir akordu ho ninia àrea atuasaun geográfika nian sira, implementasaun ba programa deskonsentrasaun administrativa hosi Governu, promosaun ba atuasaun ne’ebé iha koordenasaun hosi servisu deskonsentradu hotu-hotu Estadu nian no apoiu tékniku ba aktividade sira ne’ebé dezenvove tiha ona hosi lideransa komunitária tradisionál sira no hosi organizasoens naun-governamentál sira.

PNUD sei fó apoiu iha kapasitasaun Jestor Distritál sira, Sekretáriu hosi Jestor Distritál sira, Diretór Distritál sira no Administrador Postu sira ne’ebé responsável ba operasionalizasaun planu deskonsentrasaun nian.

Marka prezensa iha asinatura Akordu ida ne’e, Sekretáriu Estadu Fortalesimentu Institusionál, Francisco Soares; Sekretáriu Estadu Komunikasaun Sosiál, Nélio Isaac Sarmento; Diretór-Jerál hosi Sekretaria Estadu Desentralizasaun Administrativa, Abílio Caetano no Diretora PNUD iha Timor-Leste, Noura Hamladji.