Governu Timor-Leste

Iha loron 7 fulan Marsu, Ministru Obras Públikas, Gastão de Sousa, no reprezentante Águas Portugal Timor-Leste nian (AdP Timor-Leste), Tiago Ribeiro, iha Díli, asina kontratu kooperasaun ida kona-ba Planu Mestre Saneamentu nian no Drenajen (valeta ka bee dalan) iha Díli.

Kontratu ne’e asina tiha ona entre Ministériu Obras Públikas (MOP) no AdP Timor-Leste ho durasaun fulan 6, hahú hala’o iha loron 24 fulan Marsu, no gasta orsamentu ida besik millaun 2 no rihun atus haat dólar amerikanu.

AdP Timor-Leste ninia knaar mak atu fó kapasitasaun institusionál ba pesoál Diresaun Nasionál Saneamentu Báziku nian, hanesan mos dezenvolvimentu estudu topográfiku no idráuliku nian sira no projetu enjeñaria nian, iha nível drenajen no saneamentu (inklui mós dezeñu tékniku barabarak), nune’e bele hahú ona faze ba -daruak ba implementasaun Planu Mestre ida ne’e.

Fó hanoin katak Planu Mestre Saneamentu no Drenajen nian, aprezenta hosi Ministériu hamutuk ho Melbourne Water no Yarra Valley Water, aprova tiha ona iha Sorumutuk Konsellu Ministru, iha loron 24 fulan Outubru tinan 2012.

Tuir Ministru Gastão de Sousa, “ida-ne’e hanesan faze ba-daruak husi implementasaun ba iha Planu Mestre Saneamentu no Drenajen ba sidade Díli nian. Atu bele hala’o duni projetu ida ne’e, liu-liu kona-ba komponente drenajen nian, Governu iha hanoin ida atu husu empréstimu ba Governu Xinés”.