Workshop kona-ba politika formasaun ba estrutura Pre-Deskonsentrasaun Administrativa
Sekretária Estadu Fortalesimentu Institusionál (SEFI), realiza workshop kona-ba Polítika Formasaun ba Estrutura Pre-Deskonsentrasaun Administrativa, iha Sentru Konvensaun Díli, loron 27, fulan Fevereiru.
Primeiru-Ministru, Kay Rala Xanana Gusmão, iha abertura ba workshop ne’e hateten katak “Ita hotu mai hamutuk iha ne’e la’ós mai atu lakon tán loron ida, maibé mai hamutuk iha ne’e atu hatutan liu ba malu kona-ba ita nia estadu nia móris. Ita nia Konstituisaun ohin loron kaer metin prínsipiu no valór, ne’ebé mundu tomak rekoñese ita, la’ós de’it tinan independénsia lu bá, maibé agora daudaun iha mundu globalizadu, ne’ebé teknolójia permiti ita atu akompaña fatin hotu-hotu iha dezenvolvimentu, nia frakeza, nia di’ak, no nia át. Tanba ne’e mak ohin ita hotu mai iha ne’e, ita mai iha ne’e atu haree ba dalan ida ne’ebé mak ita lao hela”.
Xanana Gusmão hatutan tán katak “Ita hatene povu sei ki’ak, ita hatene problema sei barak maibé nu’udar Estadu ita hotu kompremitidu atu hametin instituisaun tanba ne’e mak importante tebtébes ohin ita hasoru malu iha ne’e, atu tau hanoin ba malu oinsá mak reforsa ita nia soberania, reforsa ita nia demokrásia, reforsa ita nia instituisaun”.
Primeiru-Ministru hatutan tán katak, ohin ita mai ko’alia kona-ba desentralizasaun, oinsá ita atu prepara an, labele hanoin katak ba troka de’it administradór no ba tau tán de’it ita nia ema, la’ós, munisípiu iha responsabilidade boot atu kaer daudauk ona, jere daudauk ona iha Distritu tomak no buat oin-oin.
Workshop ne’e partisipa husi, Primeiru-Ministru, Kay Rala Xanana Gusmão, membrus Governu no Presidente Parlamentu Nasionál, eis membrus Governu no eis deputadu, Maijor Jenerál Komandante F-FDTL, Lere Anan Timur, Diretór Jerál no Diretór Nasionál, Administradór Distritu no Diretór Distritál sira no sosiedade sivil sira.
