Timor-Leste fó-provizóriu rai ba konstrusaun Sentru Kulturál Indonezia
Sekretáriu Estadu Terras no Propriedades, Jaime Xavier Lopes, iha loron 26 fulan Fevereiru, asina akordu ho Ambaxadór Indonézia, iha Ministériu Negósios Estranzeirus no Kooperasaun nian, iha Dili, kona-ba atribuisaun rai ho nia luan besik metro kuadradu 2.500, hodi harii sentru kulturál Indonézia nian, iha Díli, Timor-Leste.
Hafoin asina akordu, Sekretáriu Estadu Terras no Propriedades hato’o ninia agradesimentu ba Indonézia liuhosi Ambaixadór, tanba bele kria kooperasaun di’ak hodi bele harii sentru kulturál Indonézia nian iha Timor-Leste. “Ami fiar Indonézia sei harii sentru kulturál ida-ne’ebé bele kesi metin liután relasaun di’ak, entre Timor-Leste ho Indonézia. Ami mós husu Indonézia, atu harii lalais sentru kulturál ne’e”, Jaime Xavier Lopes dehan.
Embaixadór Indonézia iha Timór-Leste, Primanto Hendrasmono, agradese ba Estadu Timor-Leste, tanba fó-provizóriu rai ba Indonézia atu harii sentru kulturál. Indonezia sei esforsu-an hodi harii lalais sentru kulturál ne’e.Primanto Hendrasmono esplika mós, katak akordu ne’e bazeia ba vizita ofisiál Prezidente Taur Matan Ruak nian ba Indonézia, tinan kotuk. “Sentru kultural Indonézia ne’e atu hametin liu tán relasaun entre komunidade sira hosi rai rua. Alemde muzika, haree mós oinsá bele hasa’e kapasidade komunidade sira hodi halo negósiu ki’ik”, Embaixadór Indonézia iha Timór-Leste dehan.
Hafoin asina akordu, ekipa tékniku hosi Jakarta, akompaña hosi Ekipa Timor-Leste ne’ebé kompostu husi tékniku sira Ministériu Negósius Estranjeirus no Kooperasaun no Sekretaria Estadu Terras no Propriedades nian, halo kedas levantamentu dadus iha rai ne’ebé fó-provizóriu ona, besik Sentru Konvensoens Díli. Molok Juñu 2014, sei hala’o lansamentu fatuk dahuluk.
Asina akordu entre Sekretáriu Estadu Terras no Propriedades ho Embaixadór Indonézia, ne’e asiste hosi Vise-Ministru Negósius Estranzeirus no Kooperasaun, Sekretáriu Estadu Arte no Kultura, Ambaixadór Timór-Leste ba Vatikanu, Embaisadora Timor-Leste ba Portugál, Maria Paixao inklui mós funsionáriu no tékniku sira hosi rai rua nian.
