Governu Timor-Leste

Diresaun Nasional Ensino Báziku Ministériu Edukasaun organiza workshop iha Dili, iha loron 21 Fevereiro, ho tema: “Padraun Nasional Kualidade Eskola” (PNKE) nu’udar Guia ba Melloramentu Ensinu Báziku iha Timor-Leste.

Diretor-Jerál Edukasaun Pré-Eskolar no Ensinu Básiku (EPE-EB), Cidálio Leite, iha nia diskursu abertura hatete “workshop ne’e importante atu halibur no diskuti idea hosi partisipante sira hodi hadiak Esboso PNKE ne’ebe desenvolve tiha ona”.

Cidálio Leite mos hato’o ninia agradesimento ba UNICEF, parseiru Edukasaun ne’ebe kontrata Espesialista ida hodi produz Esbosu PNKE ne’e, nune’e mos kustu workshop ida ne’e no kontribuisaun UNICEF desde “Ukun An”.

Dirijente EPE-EB ne’e esplika mos katak sei organiza workshop ida hodi halibur mos Parseiru Edukasaun sira nian antes atu submete ba aprovasaun Ministro Edukasaun.

Ministériu Edukasaun iha misaun prinsipal rua, promove asesu edukasaun ba labarik sira hotu  no promove kualidade edukasaun.

Diretor Nasional Ensinu Baziku, Alfredo de Araújo, mós agradese ba partisipante sira ne’ebé tau ona ideia hamutuk hodi finaliza padraun ida.

PNKE Ensinu Báziku ida-ne’e hahu dezenvolve iha tinan hirak liu bá, agora maka atu finaliza liu hosi workshop nasional ne’e.

Reprezentante UNICEF iha Timor-Leste, Taka Ho, hato’o kometimentu kontinua nafatin fó apoiu hodi hadi’a kualidade edukasaun, liuliu Ensinu Báziku. “Ne’e onra boot ba UNICEF. Ami sei servisu hamutuk nafatin ho Ministériu Edukasaun, hodi dezenvolve padraun nasional ba edukasaun nian,” dehan Taka Ho.

Eskola Foun ninian aproximasaun bele hadi’a kualidade edukasaun liuhusi partisipasaun ativa labarik nian iha ensinu aprendizajen.