Governu Timor-Leste

Universidade Orientál (UNITAL) no Universidade Díli (UNDIL) ofisialmente sai ona institusaun Ensinu Superiór akreditádu. Akreditasaun Institusionál validu ba tinan 5 no iha obrigasaun atu submete ba akreditasaun programátiku iha futuru.

Akreditasaun ba universidade rua ne’e, bazeia ba rezultadu avaliasaun iha fulan Outubru 2013, husi avaliadór internasionál Prof. Dr. Nirwan Idrus, husi Malázia, Dr. Manuel Corpus, husi Filipina, no Dirce Belo, husi Timor-Leste. Objetivu husi avaliasaun ne’e, atu observa faktus kondisaun reál husi universidade rua ne’e.

Ba futuru, Ministériu Edukasaun husu ba universidade rua ne’e atu koopera nafatin hodi kumpri kritéria sira, ne’ebé fó sai ona iha Jornál da Repúblika tanba Instituisaun Superiór mak fonte sira importante no prinsipál, ba merkadu servisu niain.

Ministru Edukasaun, Bendito Freitas hato’o ida-ne’e ba jornalista sira, kinta-feira (20/2) iha sala konferénsia Ministériu Edukasaun, hafoin anúnsiu rezultadu akreditasaun ba universidade rua: “ita-nia joven sira durante ne’e, hakarak ba buka hotu de’it UNTL. Maibé, agora bele mós tau naran iha UNDIL no UNITÁL, tanba akreditadu no sai parseiru importante ba Governu, prinsipalmente dezenvolvimentu siénsia akadémika”.

Durante ne’e, UNDIL no UNITAL hatudu ona sira-nia kualidade, bazeia ba kritéria avaliasaun pontu 8, hanesan misaun institusionál, governu no manajementu administrativu, programa akadémiku, kuríkulu, estrutura dosénsia, prioridade no finanseiru. Universidade hotu-hotu tenki konsentra lai ba institusionál atu dezenvolve iha nivél nasionál.

Reitór Universidade Díli (UNDIL), António Cardoso sente kontente tébes, tanba Ministériu Edukasaun ofisialmente fó sai anúnsiu akreditasaun ba Instituisaun Ensinu Superiór rua.

“Ami kontenti tébes, tanba ami-nia universidade hetan konfiansa husi Ministériu Edukasaun hodi fó akreditasaun. Ho akreditasaun ne’e, ami bele servisu hamutuk liu tán ho Ministériu Edukasaun, hodi hadi’a nafatin sistema iha universidade”, António Cardoso dehan.

Reitór Universidade Orientál (UNITAL), Roberto Jerónimo simu akreditasaun ne’e ho laran ksolok  no promete sei haka’as an atu hadi’a nafatin kualidade instituisaun: “akreditasaun ne’e aumenta tán ami-nia responsabilidade, atu lori universidade ba era globál no prodúz joven ho matenek”.