Governu Timor-Leste

Misaun Apoiu ba Prosesu Eleitorál iha Guiné-Bissau ne’e, hala’o liuhosi pedidu ida hosi Governu Tranzitóriu Repúblika Guiné-Bissau nian ba Repúblika Demokrátika Timor-Leste, iha Setembru 2013, ne’ebé, husu apoiu tékniku no finanseiru atu hala’o atividade resenseamentu no eleisaun nian iha país ne’ebé hanesan mós Estadu-Membru g⁷⁺ nian.

Primeiru-Ministru Xanana Gusmão, hatudu Sekretáriu Estadu Desentralizasaun Administrativa, Tomás Cabral, atu koordena Misaun ne’e, ne’ebé hetan apoiu hosi reprezentante órgaun administrasaun eleitorál Timor-Leste nian no Ajénsia Kooperasaun Timor-Leste nian iha Guiné-Bissau.

Misaun Apoiu ba Prosesu Eleitorál iha Guiné-Bissau, ne’ebé kompostu hosi Gabinete Apoiu ida (harii iha Bissau, ne’ebé forma hosi komponente administrasaun, finansas no lojístika nian) no Asesoria Téknika ho Apoiu ba Resenseamentu Eleitorál Timor-Leste nian ida (forma hosi tékniku sira iha Sekretariadu Tékniku Administrasaun Eleitorál Timor-Leste nian, tama mós área informátika no Teknolojia no Formasaun), hodi fó ona apoiu ba instituisaun Guiné-Bissau nian sira, iha prepararasaun no implementasaun ba eleisaun, hanesan hakat boot ida hodi hala’o eleisaun ida ne’ebé justu to’o hetan rezultadu sira ne’ebé demokrátiku no ema bele fiar.

Oras ne’e servisu la’o hela hodi prepara programa no formasaun téknika hodi implementa kampaña edukasaun sívika ba eleisaun nian, atu nune’e bele esklarese ba eleitór sira kona-ba importánsia prosesu eleitorál nian, hodi bele konsolida prosesu demokrátiku, iha klima ida nakonu ho dame no estabilidade.

Faze dahuluk Misaun Apoiu ba Prosesu Eleitorál iha Guiné-Bissau nian, ne’ebé maka hetan susesu, hahú iha fulan Novembru 2013 no remata iha fulan Fevereiru 2014, kontribui ona atu preparasaun prosesu eleitorál, liu-liu iha faze resenseamentu eleitorál, ne’ebé importante tebes, bele hetan rezultadu sira demokrátiku no iha kredibilidade, bele hala’o ho forma ida justa, transparente no hetan rekoñesimentu nasionál no internasionál.

Oras ne’e daudaun, buat ne’ebé importante liu mak atu asegura kontinuasaun ba servisu hirak hala’o, liuhosi Misaun II Apoiu ba Prosesu Eleitorál iha Guiné-Bissau, no, atu bele tulun órgaun sira administrasaun eleitorál Guiné-Bissaun nian, bainhira sira hakarak atu hala’o eleisaun sira ba Asembléia Nasionál Popular no mós ba Prezidénsia Repúblika. Prevee ona katak eleisaun sei hala’o iha fulan Marsu no Abril 2014, no bele iha mós posibilidade atu hala’o eleisaun daruak nian ba Prezidénsia Repúblika.

Xefe Governu hatudu fila fali Sekretáriu Estadu Desentralizasaun Administrativa, Tomás Cabral, atu kontinua lidera Misaun ne’e, hodi reprezenta Governu Repúblika Demokrátika Timor-leste nian.

Hosi objetivu hirak espesífiku, ne’ebé tau ona iha planu ba Misaun II, inklui mós apoiu ba funsionamentu Sistema Baze Dadus nian ba Resenseamentu Eleitorál, apoiu ba publikasaun rezultadu finál eleisaun nian, apoiu hodi imprime no fó-sai lista eleitór sira nian, asisténsia no dezenvolvimentu programa no formasaun ba tékniku sira hodi bele implementa kampaña edukasaun sívika ba eleisaun, tulun órgaun sira administrasaun eleitorál husi Guiné-Bissau atu prepara no implementa atividade sira eleitorál nian iha estasaun votu, iha teritóriu tomak, hodi garante atu prinsípiu internasionál nian sira ne’ebé maka regula prosesu eleitorál, bele kumpri duni, durante hala’o prosesu, apoiu lojístika iha entrega no rekolla materiál eleitorál nian ba sentru no estasaun sira votu nian, tulun CNE Guiné nian atu organiza eleisaun no halo validasaun ba rezultadu sira no harii ekipa ida atu hala’o observasaun ba eleisaun hodi bele fiskaliza eleisaun ne’e rasik.

Liu tiha eleisaun, mak ekipa Misaun Apoiu ba Prosesu Eleitorál iha Guiné-Bissau sei hamenus nia membru sira, hodi hela de’it maka membru Gabinete Apoiu ba Misaun nian sira, atu bele asegura hakerek relatóriu sira, hodi bele entrega ba Órgaun Soberania Repúblika Guiné-Bissau nian.

Prevee ona katak, fulan Maiu, eskritóriu Misaun nian, bele taka ona no sei entrega ekipamentu sira hotu ba iha Governu Guiné-Bissau nian.

Atu bele hetan Relatóriu Atividade ne’ebé maka Misaun Apoiu ba Prosesu Eleitorál iha Guiné-Bissau hala’o, bele hanehan iha ne’e.