Governu Timor-Leste

Serimónia daruak entrega sertifikadu remata Kursu ba Formasaun Komplementár Intensiva nian ne’ebé hala’o iha salaun nobre INFORDEPE nian iha Dili, iha loron 31 fulan-Janeiru, no iha prezensa Ministru Edukasaun nian, Bendito dos Santos Freitas.

Serimónia ne’e entrega sertifikadu 355 ba profesór sira Rejime Tranzitóriu Karreira Dosente distritu Dili nian. Profesór sira hosi distritu 12 seluk mós simu sertifikadu iha loron 3 fulan-Fevereiru mak distritu sira (Ermera, Liquiça, Bobonaro, Manatuto, Baucau, Lautém no Viqueque) no iha loron 7 fulan-Fevereiru nian mak (Aileu, Manufahi, Ainaro, Covalima no Oe-cusse), ho nune’e kompleta ona totál profesór sira 4365 (rihun-haat-atus-tolu-neenulu-resin- lima).

Serimónia dahuluk entrega sertifikadu remata Kursu ba Formasaun Komplementár Intensiva nian hala’o tiha ona iha loron 29 fulan-Outubru tinan 2013 iha Dili no iha loron 31 fulan-Outubru iha distritu sira seluk, hodi fahe sertifikadu ba profesór sira hamutuk 841 (atus-ualu-haatnulu-resin-ida).

Kursu Formasaun Komplementár Intensiva mak programa ida ne’ebé fó formasaun ba profesór sira Ministériu Edukasaun nian, implementa hosi INFORDEPE, ne’ebé hahú iha loron 5 fulan-Novembru tinan 2012 no remata iha loron 31 fulan-Dezembru tinan 2013. Kursu ne’e hala’o ho objetivu atu forma profesór sira 7124 (rihun-hitu-atus-ida-ruanulu-resin-haat) ne’ebé integra iha Rejime Tranzitóriu Karreira Dosente nian, hodi bele konkretiza nia kualifikasaun profisionál, tuir Lei Baze Edukasaun nian mak ezije, hosi Estatutu Karreira Dosente no iha Kuadru Kompeténsia Obrigatória Pesoál Dosente nian, ho grau Baxarelatu, nune’e formasaun espesífika ne’e sertifika katak sira hetan ona abilitasaun atu hanorin, tuir nesesidade dezempeñu profisionál edukasaun nian.

Formasaun hala’o iha distritu no sub-distritu hotu país nian, hala’o no dezenvolve tiha ona iha ámbitu Akordu Kooperasaun Bilaterál entre Repúblika Demokrátika Timor-Leste no Repúblika Portugeza.

Profesór sira hotu ne’ebé simu sertifikadu remata Kursu ba Formasaun Komplementár Intensiva ne’e sei hetan sertifikadu ida ne’ebé fó hosi INFORDEPE hanesan ho Baxarelatu, ne’ebé sei válidu ba integrasaun iha Karreira Dosente, tuir diploma ministeriál n^o. 17/ME/2013, loron 25 fulan-Setembru.