Governu Timor-Leste

Ministériu Edukasaun (ME) liu husi Diresaun Nasionál Ensinu Báziku, hala’o treinamentu ba pontu vokál Ministériu Edukasaun nian husi distritu 13, durante loron rua ( 28  no 29 Janeiru 2014) iha Dili, kona-ba konsesoins eskolár.

Vise-Ministra Ensinu  Báziku, Dulce de Jesus Soares, hateten, hafoin halo enserramentu ba treinamentu, esplika, “Iha Orsamentu Jerál Estadu ba tinan 2014 nian, Ministériu Edukasaun aloka osan dólar amerikanu Millaun 4.456  ba Ensinu Pré- eskolár, Ensinu Báziku Sentrál (EBC), Ensinu Sekundáriu no Ensinu Tékniku Vokasionál”.

 Vise Ministra informa, Iha fulan ida kada alunu husi Ensinu Pré-eskolár hetan osan USD $  0.75, Ensinu Báziku hetan, U$. 100,Ensinu Sekundáriu no Ensinu Tékniku Vokasionál kada alunu hetan USD $  0,50

Alokasaun orsamentu ba eskola sira tinan ida-ne’e, atu fó apoiu ba atividade alunu sira no atividade profesór sira nian, halo  reparasaun hirak ne’ebé ki’ik no uza ba nesesidade administrasaun iha eskola.

“Bainhira profesór sira ezekuta orsamentu iha eskola idak-idak la loos, Ministériu Edukasaun sei fó sansaun tuir Lei haruka”, Vise-Ministra Dulce Soares reafirma.

Pontu vokál sira-nia funsaun atu aselera prosesu relatóriu, tanba durante ne’e relatóriu tama ba Ministériu Edukasaun sempre atraza.  Tinan ida liu bá, Eskola sira lori relatóriu diretamente ba eduksaun nasionál no laiha verifikasaun husi edukasaun distritu sira.

“Ne’e sai problema. Tinan 2014 ne’e, pontu vokál husi distritál sira sei halo verifikasaun ba relatóriu husi eskola Ensinu Báziku Central (EBC), tuir mai haruka  mai iha distritu. Ministériu Edukasaun mak sei haruka ba Ministériu Finansa,” Vise-Ministra Dulce Soares esplika tan.