Governu Timor-Leste

Ministru Estadu no Negósiu Estranjeiru no Kooperasaun, José Luís Guterres, iha loron 31 fulan Janeiru, simu Embaixadór Brazil nian iha Díli, José Dornelles, ne’ebé akompaña hosi Ministru Segunda Klase, Eduardo Carvalho. Sorumutuk ida ne’e hala’o tanba Primeiru-Ministru Kay Rala Xanana Gusmão husu apoiu ida ba iha Prezidénsia Repúblika Brazil nian, Dilma Rousseff, ba iha preparasaun no ezersísiu Prezidénsia Komunidade País hirak ko’alia Lian Portugés (CPLP) nian. Nune’e, mak diplomata karreira nian no Ministru Segunda Klase, Eduardo carvalho, sira hetan nomeasaun atu reprezenta Brazil iha Komisaun Preparasaun ba Prezidénsia Timorense CPLP nian.

“Ha’u sei fó-an atu tulun komisaun organizadora. Iha ha’u nia kareira durante tinan 34 nia laran, ha’u servisu tinan 15 iha protokolu,” afirma Eduardo Carvalho. Diplomata brazileiru ne’ebé ho otas 57 ne’e, ninia kuríkulu hatudu ona katak nia organiza Konferénsia Nasoens Unidas nian kona-ba Meiu-Ambiente no Dezenvolvimentu (KNUMAD), ne’ebé ema koñese ho naran Rio 92, nia mós organiza sorumutuk oin-oin kona-ba Merkadu Komum Sul (MERKOSUL), Konferénsia Ema Intelektuál Afrika no Diáspora sira (CIAD sigla iha lian portugés) iha tinan 2006, iha Salvador da Bahia, Brasil, no ikusliu mak Konferénsia Komunidade Estadu Latinu-Amerikanu no Karíbea (CELAC), iha Havana, Cuba.

Ministru José Luís Guterres konsidera katak atu garante susesu ba Simeira iha Dili, ne’ebé marka ona ba fulan Jullu, protokolu ne’e mak hanesan kestaun prioridade ida. Kestaun hirak polítika nian ne’e hanesan kontinuidade ida hosi prosesu ne’e, maibé karik lojístika falla, mak buat hotu sei la’o lalós”. Kona-ba Organizasaun ne’e rasik, Ministru Timoroan ne’e lakohi “CPLP ida ho diskursu de’it, maibé bele esplora liután ekonomia, liu-liu iha setór privadu.”

Nomeasaun Prezidente FRETILIN nian, Francisco Guterres “Lu-Olo” atu xefía Komisaun Preparasaun ba Prezidénsia Timorense CPLP nian “tuir duni ita nia tradisaun atu trata didi’ak opozisaun, tanba sé mak manan, interese públiku mak manan,” dehan Ministru Estadu no Negósiu Estranjeiru.