Governu Timor-Leste

Iha loron 11 fulan Dezembru, Ministru Estadu no Negósiu Estranjeiru no Kooperasaun, José Luís Guterres, ne’ebé akompaña hosi Embaixadór Timor-Leste nian iha Bruxelas, Béljika, Nelson dos Santos no Adjunta Ordenadora Suplente Timor-Leste nian, Madalena Hanjan Soares, partisipa iha sorumutuk entre PALOP ( País Afrikanu Lian Ofisiál Portugeza) no Timor-Leste. Sorumutuk ida ne’e konta mós ho prezensa Komisáriu Uniaun Europeia ba Dezenvolvimentu nian, Andri Piebalgs.

Mosambike mak lidera sorumutuk ne’e, ne’ebé diskute kona-ba Fundu Europeiu Dezenvolvimentu nian da-11^o (FED 11) ne’ebé foka liliu ba iha área sira empregu nian, kualifikasaun profisionál no inkluzaun sosiál, kultura no dezenvolvimentu. Hosi Fundu Europeu  Dezenvolvimentu da-10^o nian, sei iha nafatin atividade projetu balun ba iha área formasaun profisionál (ne’ebé lidera hosi Kabu-Verde) no ba iha eleisaun governamentál sira ba Guiné-Bissau.

Grupu PALOP-TL

Programa PALOP-TL ne’e hahú iha tinan 1992 tuir vontade ne’ebé Xefe Estadu no Governu PALOP sira nian hatudu atu estabelese programa espesífiku Kooperasaun ho Uniaun Eurepeia, iha ámbitu akordu Cotonou nian. Timor-Leste tama ona iha programa ne’e iha tinan 2005.

Programa ne’e bazeia ba lasu polítiku, istóriku, linguístiku,kulturál, sosiál no ekonómiku sira ne’ebé eziste ona entre PALOP-TL no UE, nune’e mós vontade no kompromisu hodi reforsa kooperasaun liuliu ba iha área oioin ne’ebé maka sai nu’udar interese hotu-hotu nian nune’e mós kooperasaun sul-sul iha paralelu ho Kooperasaun norte-sul. Deklarasun Dili nian iha fulan-Fevereiru tinan 2013 mai afirma fila-fali kompromisu ida ne’e.