Governu Timor-Leste

Governu liuhosi, Sekretaria Estadu Komunikasaun Sosiál (SEKOMS), iha loron, 14 Janeiru 2014, inaugura estúdiu Produsaun Audiovizuál, iha Edifísiu SEKOMS, Palásiu Governu, Dili.

Estúdiu Produsaun Audiovizuál ne’e, sei produz informasaun kona-ba programa no implementasaun dezenvolvimentu nasionál husi Governu no distribui ba públiku liuhusi programa Rádiu no Televizaun.

Sekretáriu Estadu Komunikasaun Sosiál, Nélio Isaac Sarmento, iha nia diskursu hateten, “estúdiu audivizuál ne’e, atu fasilita produsaun informasaun ho rigór no kualidade, husi instituisaun Governu nian ba públiku”.

Atu hametin servisu ne’e, presiza halo kooperasaun metin ho ofisiál komunikasaun sosiál sira iha Ministériu no Sekretaria Estadu sira, atu atinji objetivu lori povu hetan asesu ba informasaun  públiku.

“Fatin ne’e mós atu fó apoiu ba professionál sira ne’ebé mak servisu iha área komunikasaun sosiál nian husi Ministériu idaidak, hodi hasa’e koñesimentu kona-ba adoptasaun teknolojia  produsaun informasaun”, Nélio Isaac hatutan tan.

Atu aumenta kapasidade ofisiál komunikasaun sosiál sira nian iha futuru, Sekretaria Estadu promete fasilita formasaun iha Ministériu Prezidénsia Konsellu Ministrus.

“Bainhira ita-nia formasaun iha média sira laiha, signifika ita-nia komunikasaun ho populasaun la to’o. No bainhira média la publika programa ba dezenvolvimentu, signifika ita-nia komunikasaun ba populasaun ne’e laiha“, Nélio Isaac dehan tan.

Marka Prezensa iha inaugurasaun Produsaun Audiovizuál ne’e, Sekretariu Estadu Komunikasaun Sosiál, Nélio Isaac Sarmento, Diretór-Jerál Prezidénsia Konsellu Ministrus, Victor Maia, Diretór-Jerál Gabinete Primeiru-Ministru, José Asa, Diretór-Jerál Interinu Sekretaria Estadu Promosaun Igualdade, Armando da Costa, Diretór Nasionál Diseminasaun Informasaun, Diretór Nasionál Sentru Rádiu Komunidade, Xefe Departamentu Komunikasaun Sosiál hosi Ministériu no Sekretária Estadu sira, Funsionáriu SEKOMS no jornalista sira.