LNEC Portugal Kapasita Funsionáriu MOP Iha area Laboratóriu
Funsionáriu Téknika Laboratóriu Ministériu Obras Públikas (MOP) nain 22 ho pesoál nain 3 hosi International Labour Organization (ILO) partisipa iha formasaun kona-ba laboratóriu nian, durante loron 10 hahú hosi loron 13 to’o 24 Janeiru 2014 iha Diresaun Nasionál Peskiza Dezenvolvimentu(DNPD), Kolmera, Dili. Formadór sira ne’e mai hosi LNEC (Laboratório Nacional de Engenharia Civil), Portugal-Lisboa.
Diretór Nasionál Peskiza Dezenvolvimentu, Saturnino Gomes B. Caldas, hatete, formandu na’in 25 ne’e hanesan funsionáriu téknika laboratoriu nian, ne’ebé husi Diresaun Nasionál Estradas, Ponte, no Kontrolu Xeias na’in 4, Diresaun Nasionál Edifikasaun na’in 2, Diresaun Nasionál Peskiza Dezenvolvimentu na’in 16, nomós hosi International Labour Organization (ILO) nain 3.
“Ha’u mos kontente tanba LNEC bele iha hanoin di’ak hodi kapasita funsionáriu sira nia koñesementu iha área laboratóriu nian, tanba ne’e ita espera katak bele hetan rezultadu di’ak mezmu sei iha difikuldade oituan ba lingua, dehan Diretór Saturnino. Atu hatán ba difikuldade ne’e, Ministériu Obras Públikas garante ezisténsia tradutór ida nian durante formasaun ne’e tomak.
Reprezentante Embaixadór Portugal, Luis Cunha hatete katak, liu husi programa ida ne’e espera katak, país rua ne’e ba oin bele iha relasaun metin liu tan.
“Ha’u hein katak ho formasaun ida ne’e sei sai hanesan benefísiu ba parte husi formadu sira atu tuir ne’e, nomos ba formadór sira, hateten Luis Cunha.
Programa formasaun ne’e konta ho patrosíniu husi LNEC, no ho apoiu husi Road Four Development (R4D) no husi OIT.
