Governu Timor-Leste

Proposta Lei kona-ba Orsamentu Jerál Estadu (OJE) ba tinan finanseiru 2014 hetan análize no diskuti iha jeneralidade, husi loron 9 to’o 11 Janeiru, iha Parlamentu Nasionál.

Proposta ne’e Primeiru-Ministru, Kay Rala Xanana Gusmão, aprezenta ona iha plenáriu, iha loron 9, ne’ebé, iha ninia diskursu ko’alia kona-ba importánsia husi kreximentu no konsolidasaun demokrasia iha Timor-Leste, hodi halo apresiasaun ba orsamentu: “Ita hakarak atu Orsamentu Jerál Estadu 2014 bele sai hanesan solusaun ida entre vontade oin-oin ne’ebé mak harii Timor-Leste, hodi buka haluan konsensu ida ne’ebé maka halo ita ko’alia ho ekuidade iha demokrasia ne’ebé ema hotu partisipa”.

Primeiru-Ministru lembra katak, maske kontestu internasionál ladún favorável, Timor-Leste konsege krexe no, liu-liu, nia konsege trasa planu ida – Planu Estratéjiku ba Dezenvolvimentu 2011-2030 – “ne’ebé mak ohin-loron halo ita bele hateke ba oin, ba meta hirak ne’ebé konkreta”.

“Ita hakarak, atu liuhusi planu ne’ebé trasa ho di’ak ne’e, bele aproveita anin favorável ba dezenvolvimentu ekonómiku ida ne’ebé inkluzivu no sustentavel liu.

Inkluzivu tanba tenki hatán ba nesesidade timoroan hotu nian ho ekuidade, liu-liu ba sira ne’ebé mak presiza liu, nune’e mós ba nesesidade ita nia komunidade sira nian husi sira ne’ebé hela besik tasi to’o ba sira ne’ebé hela iha suku sira iha foho sira iha interiór.

Sustentavel tanba labele hatan de’it ba nesesidade imediata ita nia populasaun nian, maibé uluk nana’in tenke buka konjuga resposta ida ne’ebé imediatu liután ho vizaun ida ba prazu naruk ne’ebé labele tau hanesan ipoteka rekursu hirak ne’ebé ita iha ba jerasaun oin mai”.

Primeiru-Ministru subliña tan katak, Orsamentu Estadu ida ne’e mantein kompromisu ho rigór, responsabilidade no transparénsia ne’ebé mak Governu asume ona, tan ne’e mak, “Orsamentu Jerál Estadu ba 2014 ne’ebé propen ona mak $1,5 mil millaun dólar, iha esforsu ida realístiku ho adekuasaun ba ita nia kapasidade ezekusaun nian, la’os deit atu haree ba nesesidade urjente dezenvolvimentu nian, maibé mós ba nesesidade atu haree ba inflasaun”.

Maski iha korte orsamentál, kompara ho tinan uluk nian, área prioritária sira ba Governu Konstitusionál V maka nafatin área sosiál no infra-estrutura nian sira. “Ministériu haat ne’ebé hetan kontribuisaun finanseira signifikativu liu maka Ministériu Obras Públikas, Ministériu Solidariedade Sosiál, Ministériu Edukasaun no Ministériu Saúde”, Primeiru-Ministru ko’alia hodi anunsia mós, osan ne’ebé mak aumenta ba setór saúde no edukasaun nian.

Proposta Lei ne’e hetan votu iha jeneralidade, iha Sábadu, loron 11 Janeiru, tuir kedas ho debate iha espesialidade, ho durasaun másima loron sanulu.

Atu dehan loloos mós katak debate ne’e foufoun marka tiha ona atu hala’o iha Dezembru 2013, maibé adia tiha fali, atu Primeiru-Ministru bele fó omenájem ba antigu Prezidente Áfrika Súl, Nelson Mandela.

Hanesan tinan hirak uluk, debate ne’e fó sai iha RTL no TVTL.

(Atu hetan asesu ba Komunikadu Imprensa kona-ba sorumutu Konsellu Ministru ne’ebé maka aprova ona Proposta Lei ba OJE 2014 nian, klike iha ne’e).