Governu Timor-Leste

Primeiru-Ministru, Kay Rala Xanana Gusmão, dezloka ba Áfrika Sul atu asiste serimónia hakoi mate eis-Prezidente Áfrika Sul nian, Nelson Mandela. Xanana Gusmão, ne’ebé akompañadu husi delegasaun ida ne’ebé inklui eis-Primeiru-Ministru Timor-Leste nian, Mari Alkatiri, no Vise-Ministru Negósiu Estranjeiru, Constâncio Pinto, hela iha nasaun Áfrika nian ne’e husi loron 10 to’o loron 12 fulan Dezembru nian.

Durante iha ne’ebá, Primeiru-Ministru no ninia delegasaun asiste iha fatin fó omenajen nian ba Nelson Mandela iha Estádiu FNB (Soccore City), iha Soweto, iha ne’ebé marka prezensa mós Xefe Estadu no Xefe Governu kurkuran 90, inklui Prezidente Jacob Zuma husi Áfrika Sul, Prezidente Barack Obama husi Estadus Unidus Amérika, no Prezidente Dilma Rousseff husi Brazil, nune’e mós ho família husi eis-Prezidente Mandela. Ho mós prezensa ema afrika sul rihun ba rihun ne’ebé nakonu ho emosaun, serimónia ne’e sai hanesan momentu úniku ida ne’ebé fó hanoin fila-fali Madiba nia pesoa no buat ne’ebé nia husik hela.

Iha loron 11 fulan Dezembru, Primeiru-Ministru no ninia delegasaun iha oportunidade hodi ba Union Building, sede Prezidénsia Áfrika Sul nian, iha Pretória, iha despedida ikus nian ho Nelson Mandela, iha ne’ebé Prémiu Nobel Dame nian ne’e ninia isin rai hela atu vizitante sira bele haree (maibe labele kaer).

Atu hanonin hikas vizita eis-Prezidente Áfrika Sul ne’e nian ba Kay Rala Xanana Gusmão bainhira sai hanesan dadur iha Cipinang, iha 1997, meiu komunikasaun sosiál sira husi Áfrika Sul nian halo entrevista badak ida ho Primeiru-Ministru iha jardín Prezidénsia nian. Iha ne’e maka fó hanoin fila-fali kona-ba pedidu Nelson Mandela nian ba autoridade Indonézia nian sira atu vizita Primeiru-Ministru atuál Timor-Leste nian, pedidu irrekuzavel ida ne’ebé fó impulsu internasionál ida ne’ebé importante ba Timor-Leste nia luta ba ukun-an.

Delegasaun Timor-Leste nian fó mós omenajen espesiál ida ba Nelson Mandela hodi hakat ba iha Prasa ida ne’ebé tau nia naran no iha ne’ebé iha estátua eis-Prezidente Áfrika Sul nian ne’e. Besik estátua ne’e lider timoroan na’in rua – Primeiru-Ministru Kay Rala Xanana Gusmão no eis-Primeiru-Ministru, Mari Alkatiri, tau Ai-funan hodi povu Timor-Leste nia naran. Ida ne’e sai hanesan momentu ida simbóliku tebetebes, tanba manifesta espíritu rekonsiliasaun nian ne’ebé ohin loron Timor-Leste elojia, hodi materializa lisaun ne’ebé eis-Prezidente Mandela husik hela.