Governu Timor-Leste

Ministru Justisa, Dionísio Babo, iha kinta-feira loron 5 fulan Dezembru, fó pose ba Notáriu no Konservadór sira hamutuk na’in lima iha serimónia ida ne’ebé hala’o iha edifísiu Diresaun Nasionál Rejistu no Notariadu (DNRN) nian iha Dili). Sira ne’e sai hanesan timoroan dahuluk sira ne’ebé iha espesialidade ba iha área notariadu no konservatóriu nian ho funsaun atu legaliza dokumentu importante sira.

Dionísio Babo, iha ninia diskursu hateten, “Timor-Leste iha orgullu, tanba  iha ona ema na’in lima mak iha kualifikasaun ho knaar importante ida atuhodi serví povu. Ita-boot sira ninia prezensa importante tebes, tanba servisu barak sei hein hela ita-boot sira.”

Inisiativa atu investe timoroan iha área Notariadu no Konservatóriu nian ne’e mai husi eis-Ministra Justisa, Lúcia Lobato ho apoiu husi Governu Portugés.

Notáriu ho Konservadór sira-ne’e sei hala’o knaar iha distritu, atu tulun Juíz sira foti desizaun ba kazu ruma ne’ebé iha relasaun ho falsifikasaun dokumentu.

Prezidente Funsaun Públika, Eng. Libório Pereira, fó parabéns ba Notáriu no Konservadór sira, ne’ebé simu ona knaar importante ne’e, no husu ba sira atu, nu’udar funsionáriu públiku, tenke hala’o sira nia funsaun tuir lei ne’ebé sei vigora hela.

Iha fatin hanesan, Prezidente Tribunál Rekursu, Cláudio Ximenes, mós husu sira ne’ebé foin simu pose atu servisu ho responsabilidade atu nune’e bele tulun juíz sira ninia servisu loroloron nian.