Governu Timor-Leste

Diresaun Nasionál Média Edukativu no Sentru Impresaun, mak hanesan responsável ba apredizajen liuhusi televizaun, rádiu no publikasaun sira Ministériu Edukasaun nian, iha loron 4 fulan Dezembru, hala’o workshop ida iha Dili ho tema, “Aprezentasaun Progresu, Dezafiu, Programa Aprendizajen no planu ba tinan 2014-2017”.

Objetivu husi workshop ne’e mak aprezenta servisu ne’ebé durante ne’e halo tiha ona, no halibur ideia husi entidade relevante sira atubele hatene poténsia, dezafiu no estratéjia sira hodi dezenvolve di’ak liután, Média Edukativu iha futuru.

Diretór Jerál Servisu Korporativu Ministériu Edukasaun nian, Antoninho Pires, ba jornalista sira hateten, workshop ne’e importante atu hatete kona-ba importánsia husi uza Média Edukativu, hanesan meiu ida ne’ebé bele ajuda profesór no alunu sira uza kanál televizaun, atu hanorin no estuda matéria sira.

Iha fatin hanesan, Prezidente Komisaun Funsaun Públika, Eng. Libório Perreira, hateten, prosesu aprendizajen hotu-hotu, la presiza liuhusi aula de’it, maibé bele mós liuhusi média hanesan Rádiu no Televizaun.

“Presiza diskuti didi’ak kona-ba fasilidade Média Edukasaun nian, atu iha futuru Governu bele dezenvolve programa edukativu sira, liuhusi Televizaun Edukasaun atu ema bele aprende iha uma,” Libório esplika.

Iha mundu globalizadu ohin-loron, fasilidade teknolojia dijitál nian halo ema fásil atu hetan asesu ba matéria edukativa sira ho lalais, kompara ho prosesu aprendizajen iha aula.

Iha fatin hanesan Sekretáriu Estadu Komunikasaun Sosiál, Nélio Izaac Sarmento hateten, Diresaun Nasionál Média Edukativu iha papél importante ba komunidade no nasaun, liuliu ba alunu sira.

“Liuhusi Média Edukativu, la’os de’it bele hatutan matenek ba foin sa’e sira, maibé bele mós habelar koñesimentu ba povu”.

Kona-ba Televizaun Edukasaun, Sekretáriu Estadu hateten “planu ne’e di’ak, maibé seidauk iha ekilíbriu ho kondisaun infraestrutura iha setór edukasaun nian, ne’ebé to’o ohin loron seidauk rezolve.”