Governu promove produtu husi Sentru Bambu
Ministru Petróleu no Rekursu Minerál, Alfredo Pires, ho Secretária Estadu ba Apoiu no Promosaun Setór Privadu, Veneranda Lemos, asina protokolu sosa mobiliáriu husi Sentru Bambu Timor-Leste, iha 31 Outubru, iha Salaun Konferénsia SEAPRI, Dili.
Hafoin asina akordu, Ministru Alfredo Pires hateten katak, polítika hodi sosa produtu mobiliáriu ne’e hanesan polítika diversifikasaun ida atu promove produtu bambu iha Timor-Leste. “Ida ne’e, polítika ida ne’ebe ami bolu dehan divertifikasaun, saida mak Ministériu bele halo atu fó kontribuisaun hodi hamosu buat seluk , ekonomia seluk, tamba aban bainrua ita hakarak ka lakohi ita nia mina sei hotu maske sei lori tinan barak. Bambu ne’e ami kokoh tiha ona, tamba nia kualidade ne’e di’ak, forte, no baratu liu, tan ne’e ita lalika hanoin tan”, hatutan Alfredo Pires.
Iha fatin hanesan, Veneranda Lemos iha nia mensagen hato’o ninia agradesimentu ba Ministru Alfredo Pires, ne’ebé fó ona inisiativa hodi hili produtu bambu sai hanesan ekipamentus ba eskritóriu. Nia mós husu ba Timor oan hotu, ba empreza sira liu-liu ba Governu, atu bele hahú uza ona produtu bambu, hodi bele hakbiit no reforsa setór privadu iha Timor-Leste.
Iha fatin hanesan Diretór Sentru Bambu, Sabino Rua, mos hatutan tan “hau sente kontente teb-tebes Ministériu Petróleu no Rekursu Minerál mak ba dala uluk halo promosaun ba produtu lookál hodi uza matéria prima bamboo”.
Asaun ida ne’ebe mak Ministériu Petróleu no Rekursu Minerál halo hanesan parte ida atu fó kontribuisaun ba ekonomia nasionál liu-liu ba povu agrikultór sira ne’ebé fa’an au iha foho ne’ebá. Agora daudaun trabalhadór sira ne’ebé mak servisu iha Sentru Bambu hamutuk 59.
