Governu Timor-Leste

Totál profesór 5.167, hosi nível ensinu hotu-hotu nian, sei tuir kursu ida ba formasaun intensive ho ninia durasaun loron 29, hahú husi loron 4 fulan Novembru to’o loron 14 fulan Dezembru.

Kursu ne’e ba profesór sira husi Rejime Kareira Dosente (RKD) nian, sei hala’o iha segunda-feira to’o sesta-feira (tuku 8:30 to’o 11:30 no tuku 13:30 to’o 16:30), ho totál oras 168. Organiza husi Institutu Nasionál Formasaun Dosente no Profisionál sira Edukasaun nian (INFORDEPE) no ho objetivu jerál atu hakle’an koñesimentu kurrikulár espesífiku hosi nível/disiplina ida-idak, haree liubá iha área téknika no siénsia ezata sira. Objetivu ikus mak atu halo promosaun hodi hadi’a liután funsaun ne’ebé loloos ba prosesu ensinu no aprendizajen sistema ensinu nian.

Ministru Edukasaun, Bendito dos Santos Freitas, iha abertura kursu, iha loron 04 fulan Novembru iha Salaun Dom Bosco Dili, ko’alia kona-ba kursu formasaun intensivu ne’e obrigatóriu ba dosente sira, tanba bele habelar-tán koñesimentu profesór sira nian kona-ba konteúdu pragmátiku hosi nível ensinu/disiplina oioin no ninia objetivu prinsipál atu prepara dosente sira ba traballu ne’ebé sei hala’o iha sala aula nian.

Kursu ne’e la’ós ba diretrís de’it ne’ebé trasa hosi Ministériu Edukasaun ba nesesidade profesór sira ne’ebé atu domina koñesimentu tékniku-sientífiku hosi disiplina ida-idak, maibé mós iha konteúdu pedagójiku nível ensinu/diversidade disiplina sira nian, tuir kurríkulu siklu hotu ensinu nian la’ós superiór.

Ne’e ho intensaun hakarak atu prepara dosente timor-oan sira, kona-ba- traballu iha sala, liliu iha relasaun ho elaborasaun planu materiál didátiku, hodi observa ba diretrís sira ne’ebé hakerek iha planu kurrikulár”,ténik Ministru Edukasaun.

Kursu ne’e sei hala’o iha distritu 13 no dosente sira sei fahe husi Sentru Formasaun 24 tuir eskema distribuisaun nian mak hanesan:

- Dosente sira Edukasaun Pré-Eskolár nian sei konsentra iha Dili, iha Eskola Bázika Sentrál Farol nian;

- Dosente sira hosi 1.^u no 2.^u siklu Ensinu Báziku nian  sei konsentra iha sira nia kapitál distritu ida-idak nian;

- Dosente sira hosi 3^u Siklu Ensinu Báziku nian sei fahe ba Polu Formasaun INFORDEPE 4: Baucau, Díli, Same Maliana no Pante Macassar;

- Dosente sira Ensinu Sekundáriu Jerál no disiplina Komponente Jerál Ensinu Sekundáriu Tékniku-Vikasionál, sei halibur hamutuk iha Díli no sei fahe tuir disiplina sira ne’ebé mak sira hanorin, ba Sentru Formasaun 3 iha Kapitál. Disiplina sira Komponente Jerál nian ne’ebé hanorin iha Eskola Katólika Paulo VI, Komponente Siénsia Sosiál no Umanu iha Eskola Bázika Filial Nularan no Komponente Siénsia no Teknolojia iha Eskola Sekundária Jerál 4 Setembru nian.

Ensinu Tékniku Vokasionál sei halibur hamutuk iha Koléjiu Fatumaka, ne’ebé sei fornese formasaun ba profesór sira hosi Eskola Téknika, Eskola Komérsiu, Eskola Otelaria no Turizmu no Eskola Agríkola nian sira.

Kursu Intensivu sei responsabiliza hosi formadór timoroan sira, ho apoiu no supervizaun hosi profesór portugés sira husi Projektu Formasaun Inisiál no Kontínua Profesór sira nian (PFICP) hanesan profesór sira husi Eskola Referénsia. Profesór portugés sira sei prezente iha país laran tomak, hodi fó apoiu ba formadór sira iha implementasaun no dezenvolvimentu ba aktividade formasaun, nune’e mós atu halo avaliasaun ba prestasaun ba formadór sira iha pontudevista sientífiku, metodolójiku no atitude no valór nian sira.

Sei implementa modelu avaliasaun kontínua ida ba kompeténsia ne’ebé hetan, liuhusi observasaun no rejistu informasaun sira ne’ebé relasiona la’os de’it ba aspektu dezempeñu nian hosi nível kompeténsia sientífika, maibé mós ba parámetru hanesan asiduidade no pontualidade, partisipasaun efetiva no empeñu iha atividade lektiva sira, traballu individuál no grupu nian, espíritu kooperasaun no tulun malu nian, no seluk-seluk tán. Prevee mós katak, bainhira formasaun ramata, formandu sira hotu sei halo prova avaliasaun eskrita ida, atu hetan klassifikasaun mínima ida atu hodi bele hetan sertifikadu aproveitamentu nian.

Partisipa iha serimónia ne’e Embaixadór Portugal, Manuel Gonçaves de Jesus, Embaixadór Brasil, José Amir da Costa no Pároku Becora, Nelson Gonçalves, SDB.